માંડવીના કેવડી જંગલમાં દક્ષિણ ગુજરાતની પ્રથમ જંગલ સફારી શરૂ થઈ

સુરત વન વિભાગ દ્વારા માંડવી તાલુકાના કેવડી જંગલ વિસ્તારમાં દક્ષિણ ગુજરાતની સૌપ્રથમ જંગલ સફારીનો સત્તાવાર પ્રારંભ કરવામાં આવ્યો છે. આ સફારી રૂટ કેવડીથી રાજાના ટાંકા સુધી આશરે ૫ કિલોમીટર લાંબા કુદરતી જંગલ માર્ગ પર વિસ્તરેલો છે.

આ સફારી દરમિયાન પ્રવાસીઓ હરણ, નીલગાય, દીપડા અને આકર્ષક ઉડતી ખિસકોલી જેવા વન્યજીવો તેમજ સેંકડો પ્રજાતિના પક્ષીઓને નજીકથી જોઈ શકશે. અહીં હોર્નબિલ જેવા દુર્લભ પક્ષીઓ પણ જોવા મળે છે. અગાઉ ૨૦૨૩ના બર્ડ ફેસ્ટિવલ દરમિયાન અહીં ૧૧૬ પ્રકારના પક્ષીઓની નોંધણી થઈ હતી, પરંતુ તાજેતરના સર્વે મુજબ પક્ષીઓની કુલ પ્રજાતિઓની સંખ્યા વધીને ૨૦૨ સુધી પહોંચી છે.

સુરત ડિવિઝનના નાયબ વન સંરક્ષક ધીરજ કુમારે જણાવ્યું હતું કે, તેમનો ઉદ્દેશ્ય આખી ટૂરને સંપૂર્ણ પર્યાવરણપ્રેમી બનાવવાનો છે. હાલમાં પ્રથમ તબક્કામાં ડીઝલ વાહનો દ્વારા સફારી શરૂ કરવામાં આવી છે, પરંતુ ટૂંક સમયમાં અહીં ઇલેક્ટ્રિક જીપો દોડાવવામાં આવશે.

કેવડી વિસ્તાર અગાઉ તેની પ્રાકૃતિક સુંદરતા અને જળાશયો માટે જાણીતો હતો.