ડિક્સન ટેક્નોલોજીસ આંધ્રપ્રદેશના તિરૂપતિમાં કરશે ₹૭૦૦ કરોડનું રોકાણ

ધ હિન્દુ બિઝનેસલાઇન અહેવાલ મુજબ, ડિક્સન ટેક્નોલોજીસ દ્વારા આંધ્રપ્રદેશના તિરૂપતિમાં ₹૭૦૦ કરોડનું નવું રોકાણ કરવાની યોજના ઘડવામાં આવી છે. આ માહિતી શિક્ષણ, આઈટી અને ઈલેક્ટ્રોનિક્સ મંત્રી નારા લોકેશ અને ડિક્સન ટેક્નોલોજીસના પ્રેસિડેન્ટ તથા ચીફ ઓપરેટિંગ ઓરિસર પંકજ શર્મા વચ્ચે ૩૧મી સીઆઈઆઈ પાર્ટનરશિપ સમિટમાં શુક્રવારે મળેલી બેઠક દરમિયાન બહાર આવી હતી.

આ બેઠકમાં પંકજ શર્માએ તિરૂપતિ ખાતે આવેલ ઈએમસી-ટુ માં ₹૭૦૦ કરોડનું નવું રોકાણ કરવાની તૈયારી દર્શાવી હતી. આ નવા રોકાણથી રાજ્યના યુવાનો માટે કુલ ૨,૩૦૦ જેટલી રોજગારીની તકોનું સર્જન થશે. મંત્રી નારા લોકેશે કોપાર્થી અને તિરૂપતિ ખાતે ડિક્સન તિરૂપતિ હબ માટે વિસ્તરણ યોજનાઓ તૈયાર કરવા બદલ ડિક્સનનો આભાર વ્યક્ત કર્યો હતો, જે ભારતનો સૌથી મોટો એલઈડી ટીવી પ્લાન્ટ છે.

આ બેઠક દરમિયાન મંત્રી લોકેશે ડિક્સનને ડિક્સન-ઇન્વેન્ટેક જેવી હેઠળ આંધ્રપ્રદેશમાં લેપટોપ, ડેસ્કટોપ અને સર્વર મેન્યુફેક્ચરિંગ યુનિટ સ્થાપવા માટે પણ આમંત્રણ પાઠવ્યું હતું. આ પ્રસંગે બોલતા ડિક્સનના પ્રેસિડેન્ટ પંકજ શર્માએ જણાવ્યું હતું કે, ડિક્સન ટેક્નોલોજીસ વર્ષ ૨૦૧૮થી તિરૂપતિમાં ઇન-હાઉસ એલસીએમ લાઇન સાથે ભારતનો સૌથી મોટો એલઈડી ટીવી પ્લાન્ટ (શાઓમી અને અન્ય બ્રાન્ડ્સ માટે) ચલાવી રહી છે.

પંકજ શર્માએ વધુમાં માહિતી આપી હતી કે કડપા જિલ્લાના કોપાર્થી ખાતે એઆઈએલ ડિક્સન (સીપી પ્લસ)નો પણ વિસ્તાર કરવામાં આવી રહ્યો છે. આ વિસ્તરણ પાછળ ₹૪૫૦ કરોડનો ખર્ચ કરવામાં આવશે, જેનાથી આ વિસ્તારમાં ૭,૦૦૦ રોજગારીની નવી તકોનું નિર્માણ થશે. આ બંને કંપનીઓના રોકાણ અને વિસ્તરણ થકી આંધ્રપ્રદેશમાં ઈલેક્ટ્રોનિક્સ મેન્યુફેક્ચરિંગ ક્ષેત્રે મોટો વેગ મળવાની અપેક્ષા રાખવામાં આવી રહી છે, જેનાથી સ્થાનિક યુવાનોને રોજગારી મેળવવાની મોટી તકો પ્રાપ્ત થશે.