ગુજરાતમાં ઠંડકનો ચમકારો અને દેશના ૧૩ રાજ્યોમાં ભારે વરસાદનું એલર્ટ

હવામાન વિભાગ દ્વારા દેશના ૧૩ રાજ્યોમાં ભારે વરસાદની આગાહી કરવામાં આવી છે. આ અહેવાલ મુજબ આંધ્રપ્રદેશ, તેલંગાણા, કેરળ, તમિલનાડુ તેમજ ઉત્તરાખંડ અને હિમાચલ પ્રદેશમાં ભારે વરસાદની શક્યતા છે, સાથે જ ૭૫ કિમીની ઝડપે પવન ફૂંકાઈ શકે છે. જોકે, આ હવામાન એલર્ટમાં ગુજરાતનો કોઈ ઉલ્લેખ કરવામાં આવ્યો નથી.

ગુજરાતમાં હાલ મિશ્ર ઋતુનો અનુભવ થઈ રહ્યો છે. ઉત્તર પૂર્વના પવનોને કારણે તાપમાનમાં ૨ થી ૩ ડિગ્રી સુધીનો ફેરફાર જોવા મળી રહ્યો છે. રાજ્યમાં લઘુતમ તાપમાન ૨૦ થી ૨૧ ડિગ્રી અને મહત્તમ તાપમાન ૩૫ થી ૩૬ ડિગ્રી વચ્ચે રહેવાની સંભાવના છે. સૌરાષ્ટ્ર અને કચ્છના વિસ્તારોમાં ઠંડી ધીમી ગતિએ આગળ વધી રહી છે. છેલ્લા ૨૪ કલાકમાં સૌરાષ્ટ્ર-કચ્છમાં તાપમાનમાં એકથી બે ડિગ્રીનો ઘટાડો થયો છે.

રાજ્યના સૌથી ઠંડા નગર તરીકે આજે નલિયાને બદલે અમરેલી નોંધાયું છે. અમરેલીમાં ૧૭.૪ ડિગ્રી લઘુતમ તાપમાન નોંધાયું હતું, જ્યારે નલિયામાં ૧૭.૭ ડિગ્રી તાપમાન હતું. અન્ય શહેરોમાં મહુવા-કંડલામાં ૧૮.૭, રાજકોટમાં ૧૯, જૂનાગઢ-કેશોદમાં ૧૯.૭, પોરબંદરમાં ૨૦, દીવમાં ૨૧.૬, સુરેન્દ્રનગર-ભાવનગરમાં ૨૧.૮, દ્વારકામાં ૨૪.૨, વેરાવળમાં ૨૪.૬ અને ઓખામાં ૨૫.૧ ડિગ્રી લઘુતમ તાપમાન નોંધાયું હતું. છેલ્લા ૨૪ કલાકમાં અમરેલી, પોરબંદર, કેશોદ અને જૂનાગઢમાં બે ડિગ્રીનો ઘટાડો થયો છે, જ્યારે ઓખા, દીવ અને રાજકોટમાં એક ડિગ્રીનો ઘટાડો જોવા મળ્યો છે.

કચ્છમાં શિયાળાના આગમનના સંકેતો મળી રહ્યા છે, જ્યાં મોડી રાતથી વહેલી સવાર સુધી ઠંડક પ્રસરી રહી છે. શહેરોની સરખામણીમાં ગ્રામ્ય વિસ્તારોમાં ઠંડીનું પ્રમાણ વધુ હોવાથી સવાર-સાંજ ગરમ કપડાં પહેરવાની જરૂરિયાત ઊભી થઈ છે. હાલ પંખા બંધ કરવા પડે તેવી કડકડતી ઠંડી હજુ શરૂ થઈ નથી.