સાપુતારાની મહિલાની ફેક ઇન્સ્ટાગ્રામ આઈડી બનાવનાર મહારાષ્ટ્રથી ઝડપાયો

ડાંગ જિલ્લાના સાપુતારા પોલીસ સ્ટેશનની ટીમે એક મહિલાની ફેક ઇન્સ્ટાગ્રામ આઈડી બનાવીને તેને સોશિયલ મીડિયા પર બદનામ કરવાના ગુનાનો પર્દાફાશ કરીને આરોપીને મહારાષ્ટ્રમાંથી ઝડપી પાડ્યો છે. સંદેશના અહેવાલ મુજબ, આ ગુનામાં મહારાષ્ટ્રના નાશિક જિલ્લાના ચાંદવડ ગામના રહેવાસી ૨૬ વર્ષીય મહેશ શિવાજી જાદવને પકડવામાં આવ્યો છે.

આરોપીએ મહિલા અને તેમના પિતાના ફોટાનો ઉપયોગ કરીને ફેક ઇન્સ્ટાગ્રામ આઈડી બનાવી હતી. આ આઈડી પર તેણે ફોટા સાથે અશોભનીય લખાણ લખીને પોસ્ટ કરવામાં આવી હતી, જેથી મહિલાની બદનામી થાય. આ ઘટનાના સંદર્ભમાં સાપુતારા પોલીસ સ્ટેશનમાં ભારતીય ન્યાયસંહિતા ૨૦૨૩ની કલમ-૩૫૨ અને ઇન્ફોર્મેશન ટેકનોલોજી એક્ટ-૨૦૦૦ની કલમ-૬૬(સી) તથા ૬૭ મુજબ ગુનો નોંધવામાં આવ્યો હતો.

આ કેસને ઉકેલવા માટે સુરત વિભાગના પોલીસ મહાનિરીક્ષક પ્રેમવીર સિંહ, ડાંગ જિલ્લા પોલીસ અધિક્ષક પૂજા યાદવ અને નાયબ પોલીસ અધિક્ષક કે.આર. ડિમરી તથા જનેશ્વર નલવાયાના માર્ગદર્શન હેઠળ કામગીરી કરવામાં આવી હતી. સાપુતારા પોલીસ સ્ટેશનના પોલીસ ઇન્સ્પેક્ટર જે.કે. બારીયા અને તેમની ટીમે ટેક્નિકલ સોર્સ અને ટેક્નિકલ એનાલિસિસની મદદથી આ ગુનાનો પર્દાફાશ કર્યો હતો.

પોલીસે ટેક્નિકલ ટીમના આધારે તપાસ આગળ વધારીને મહારાષ્ટ્રના ચાંદવડ ગામથી આરોપી મહેશ શિવાજી જાદવને પકડી પાડ્યો હતો. પોલીસે આરોપી પાસેથી ગુનામાં ઉપયોગમાં લેવાયેલ ₹૫,૦૦૦ની કિંમતનો એક ઓપો (OPPO) કંપનીનો મોબાઈલ ફોન જપ્ત કર્યો છે. સાપુતારા પોલીસે આ બાબતે વધુ તપાસ હાથ ધરી છે.