કર્ણાટકના કોડાગુમાં બોટ પલટી જતાં સુરતના દંપતીનું કરુણ મોત

સંદેશના અહેવાલ મુજબ, કર્ણાટકના કોડાગુ જિલ્લામાં શુક્રવારે સાંજે હારંગી જળાશયના બેકવોટર વિસ્તારમાં બોટ પલટી જતાં સુરતના એક પ્રવાસી દંપતીનું ડૂબી જવાથી મોત થયું હતું. આ અકસ્માત કુશલનગર નજીક એલિફન્ટ કેમ્પ પાસે સાંજે આશરે ૬ વાગ્યે બનેલો હતો.

પ્રાથમિક માહિતી અનુસાર, બોટ જ્યારે તીવ્ર વળાંક લઈ રહી હતી ત્યારે તેનું સંતુલન બગડ્યું અને તે પલટી ગઈ હતી. બોટમાં ચાર સભ્યો સવાર હતાં. અકસ્માત સમયે પરિવારના તમામ ચાર સભ્યોએ લાઇફ જેકેટ પહેર્યા હતાં, તેમ છતાં ૫૦ વર્ષીય ધર્મેશ અને તેમની ૪૮ વર્ષીય પત્ની નિમ્મી બોટની નીચે ફસાઈ ગયા હતાં અને ડૂબી ગયા હતાં. જોકે, સ્થાનિક લોકોએ બોટમાં સવાર તેમના બે બાળકોનો સુરક્ષિત બચાવ કર્યો હતો.

મૃતકો સુરતથી પ્રવાસ માટે કોડાગુ આવ્યા હતાં. ઘટનાની જાણ થતા જ કુશલનગર ગ્રામ્ય પોલીસની ટીમ ઘટનાસ્થળે પહોંચી હતી. પોલીસે આ મામલે કેસ નોંધીને બોટ પલટી જવાના કારણો સહિત સમગ્ર અકસ્માતની તપાસ હાથ ધરી છે.

કોડાગુ એ કર્ણાટકના દક્ષિણ ભાગમાં આવેલો એક જિલ્લો છે જે તેના કુદરતી સૌંદર્ય અને પ્રવાસન સ્થળો માટે જાણીતો છે.