સબરીમાલામાં પાણીના સ્ટોલ પર ગંદકી અંગે કેરળ હાઈકોર્ટની કડક સૂચના

સબરીમાલા મંદિરના માર્ગ પર આવેલા પાણીના સ્ટોલની અત્યંત ખરાબ હાલત અને ત્યાં જોવા મળતી ગંદકી અંગે કેરળ હાઈકોર્ટે સખત નારાજગી વ્યક્ત કરી છે. આજતકના અહેવાલ મુજબ, કોર્ટે કેરળ વોટર ઓથોરિટી (KWA) ને સ્પષ્ટ નિર્દેશ આપ્યો છે કે તીર્થયાત્રાના સમગ્ર સીઝન દરમિયાન આ સ્ટોલને સ્વચ્છ, સુરક્ષિત અને સારી હાલતમાં રાખવા પડશે.

જસ્ટિસ રાજા વિજયરાઘવન વી અને જસ્ટિસ કેવી જયકુમારની બેંચ સમક્ષ જ્યારે આ પાણીના સ્ટોલના ફોટા રજૂ કરવામાં આવ્યા, ત્યારે તેમાં પાણીના નળની નીચે કચરો અને ગંદકી જમા થયેલી જોવા મળી હતી. આ ફોટાઓ દ્વારા સ્ટોલની જર્જરિત હાલત પણ સામે આવી હતી. આ બાબત પર ધ્યાન આપતા કોર્ટે જણાવ્યું હતું કે શ્રદ્ધાળુઓને પીવા માટે સુરક્ષિત પાણી પૂરા પાડવાના હેતુથી જે વ્યવસ્થા કરવામાં આવી છે, તેની આવી હાલત બિલકુલ સ્વીકાર્ય નથી. કોર્ટે સત્તાધિકારીઓને તાત્કાલિક સફાઈ અને જાળવણી માટે જરૂરી પગલાં લેવા આદેશ આપ્યો છે.

હાઈકોર્ટે કેરળ વોટર ઓથોરિટી પાસે એ પણ માંગ કરી છે કે તેઓ જણાવે કે પાણીના સ્ટોલને સ્વચ્છ રાખવા અને શ્રદ્ધાળુઓને સુરક્ષિત પાણી આપવા માટે અત્યાર સુધીમાં કયા પગલાં લેવામાં આવ્યા છે. આ ઉપરાંત, કોર્ટે એવા અધિકારીઓ અને કર્મચારીઓની વિગતો પણ માંગી છે, જેમને સન્નિધાનમમાં આ સ્ટોલની દેખરેખ રાખવાની જવાબદારી સોંપવામાં આવી છે.

કોર્ટે પૂરતી સંખ્યામાં સફાઈ કામદારો તૈનાત કરવા અને સમયાંતરે તમામ સ્ટોલની તપાસ કરવા માટે નિર્દેશ આપ્યો છે. બેંચે સ્પષ્ટ કર્યું હતું કે માત્ર સ્ટોલ સ્થાપી દેવાથી અથવા ક્યારેક ક્યારેક નિરીક્ષણ કરી લેવાથી જવાબદારી પૂરી થતી નથી. આખા તીર્થયાત્રા સીઝન દરમિયાન આ સ્ટોલ સ્વચ્છ અને કાર્યરત રહે તે અત્યંત આવશ્યક છે.

કોર્ટની ચિંતા માત્ર ગંદકી પૂરતી મર્યાદિત નથી, પરંતુ સુરક્ષાના મુદ્દા પર પણ છે. અગાઉના તીર્થયાત્રા સીઝન દરમિયાન એક ઘટના બની હતી જેમાં પાણી પીવાનો પ્રયાસ કરતી વખતે એક શ્રદ્ધાળુને કરંટ લાગ્યો હતો. ત્યાં વીજળીનો એક વાયર ખુલ્લો અને ચાલુ અવસ્થામાં હતો. આ ઘટનાનો ઉલ્લેખ કરતા કોર્ટે કહ્યું હતું કે આવી બેદરકારી ફરીથી ન થવી જોઈએ. KWA એ તમામ સ્ટોલની વાયરિંગ, વીજ જોડાણો અને અન્ય ઉપકરણોની સંપૂર્ણ તપાસ કરવી પડશે. ખુલ્લા અથવા ખરાબ વાયરોને તાત્કાલિક ઠીક કરવા અને વીજ સુરક્ષાના જરૂરી આયોજન કરવાના આદેશો પણ આપવામાં આવ્યા છે.

આ કેસ ૨૦૨૬-૨૭ ના મંડલકાલ-મકરવિલક્કુ તીર્થયાત્રા સીઝનની તૈયારીઓ સાથે જોડાયેલી એક અરજી પર સુનાવણીના ભાગરૂપે ચાલી રહ્યો છે. સબરીમાલાના સ્પેશિયલ કમિશનરના અહેવાલના આધારે કોર્ટે આ મામકો પોતાની મેળે જ શરૂ કર્યો હતો. સુનાવણી દરમિયાન સ્પેશિયલ કમિશનર તરફથી રજૂ કરવામાં આવેલા એમિકસ ક્યુરીએ પાણીના સ્ટોલની ખરાબ હાલતના ફોટા રજૂ કર્યા હતા, જેના આધારે કોર્ટે આ કડક સૂચનાઓ આપી છે.

હવે કેરળ વોટર ઓથોરિટી સામે માત્ર સફાઈ કરવાનો જ પડકાર નથી, પરંતુ એ પણ સુનિશ્ચિત કરવાનું છે કે સબરીમાલા આવતા લાખો શ્રદ્ધાળુઓને આખા સીઝન દરમિયાન સ્વચ્છ પાણી મળે અને પાણી પીતી વખતે તેમના જીવને કોઈ જોખમ ન રહે. કોર્ટના આ આદેશો બાદ હવે સત્તાધિકારીઓએ આ બાબતે સજાગ બનવું પડશે.

આ સ્થળ લાખો શ્રદ્ધાળુઓ માટે આસ્થાનું કેન્દ્ર છે અને દર વર્ષે અહીં મોટી સંખ્યામાં યાત્રાળુઓ દર્શન માટે આવે છે.