પ્રસિડેન્સી યુનિવર્સિટી દ્વારા સ્વામી વિવેકાનંદના પોસ્ટર પર અપશબ્દો લખવાના કેસમાં બે વિદ્યાર્થીનીઓ નિષ્કાસિત

હિન્દુસ્તાન ટાઇમ્સના અહેવાલ મુજબ, કોલકાતાની પ્રસિડેન્સી યુનિવર્સિટીએ સ્વામી વિવેકાનંદની તસવીરવાળા પોસ્ટર પર કથિત રીતે અપશબ્દો લખવા અને અન્ય સંસ્થાઓ સામે અપમાનજનક ભાષાનો પ્રયોગ કરવા બદલ બે વિદ્યાર્થિનીઓને યુનિવર્સિટીમાંથી હાંકી કાઢી છે. યુનિવર્સિટીના એક અધિકારીએ શનિવારે આ માહિતી આપી હતી.

આ સમગ્ર વિવાદ ૧૩ ઓક્ટોબરે શરૂ થયો હતો, જ્યારે અખિલ ભારતીય વિદ્યાર્થી પરિષદ (એબીવીપી) દ્વારા કેમ્પસમાં સ્વામી વિવેકાનંદનું ફોટોવાળું પોસ્ટર લગાવવામાં આવ્યું હતું. આ પોસ્ટર પર અપમાનજનક ટિપ્પણીઓ કરીને તેની વિડંબના કરવામાં આવી હોવાના આક્ષેપો થયા હતા. ત્યારબાદ એબીવીપીએ નિષ્પક્ષ તપાસ અને દોષિતો સામે કડક કાર્યવાહીની માંગણી સાથે પોલીસમાં ફરિયાદ નોંધાવી હતી અને યુનિવર્સિટીના ગેટ બહાર વિરોધ પ્રદર્શન પણ કર્યું હતું.

યુનિવર્સિટીના અધિકારીના જણાવ્યા અનુસાર, આ મામલે એક તપાસ સમિતિની રચના કરવામાં આવી હતી. સમિતિએ સીસીટીવી ફુટેજની ચકાસણી કરી હતી અને સંબંધિત તમામ પક્ષોને સાંભળ્યા હતા, ત્યારબાદ આ નિર્ણય લેવામાં આવ્યો હતો. બંને વિદ્યાર્થિનીઓને યુનિવર્સિટીની શૈક્ષણિક પ્રવૃત્તિઓમાં ભાગ લેવા પર પ્રતિબંધ મૂકવામાં આવ્યો છે અને તેઓ આ સંસ્થાના ભવિષ્યના કોઈપણ ડિગ્રી પ્રોગ્રામમાં પ્રવેશ મેળવવા માટે પણ પાત્ર રહેશે નહીં.

યુનિવર્સિટીએ પોતાના નિવેદનમાં સ્પષ્ટ કર્યું છે કે તેણે હંમેશાં શૈક્ષણિક ચર્ચા-વિચારણા તથા સામાજિક-રાજકીય મુદ્દાઓ પર ગૌરવપૂર્ણ વાતાવરણ જાળવી રાખ્યું છે. સંસ્થા દ્વારા વિચારકો, વિચારો કે સંગઠનો સામે થતી અપશબ્દની ભાષા કે દુર્વ્યવહાર ક્યારેય સહન કરવામાં આવશે નહીં. જોકે, યુનિવર્સિટી દ્વારા હાંકી કાળવામાં આવેલી બંને વિદ્યાર્થિનીઓની ઓળખ જાહેર કરવામાં આવી નથી.

આ ઘટના બાદ ડાબેરી સંગઠન સ્ટુડન્ટ્સ ફેડરેશન ઓફ ઇન્ડિયા (એસએફઆઈ) દ્વારા આ બનાવમાં પોતાની સંડોવણી હોવાનો ઇનકાર કરવામાં આવ્યો હતો. એસએફઆઈએ આ કૃત્યની સખત નિંદા કરતા જણાવ્યું હતું કે ડાબેરી સંગઠને ક્યારેય સ્વામી વિવેકાનંદનું અપમાન કરનારી પ્રવૃત્તિ શરૂ કરી નથી કે તેમાં ભાગ લીધો નથી. સંગઠને એમ પણ કહ્યું હતું કે હિન્દુઓની ધાર્મિક ભાવનાઓને ઠેસ પહોંચાડવાનો તેમનો કોઈ ઇરાદો ન હતો અને સીસીટીવી ફૂટેજના આધારે યોગ્ય તપાસ કરીને દોષિતો સામે પગલાં લેવાની માંગ કરી હતી.