કાનપુરમાં માનસિક અસ્થિર પુત્ર પિતાના મૃતદેહ પાસે પાંચ દિવસ સુધી બેસી રહ્યો

સંદેશ (દેશ) અહેવાલ મુજબ ઉત્તર પ્રદેશના કાનપુરના પાંકી પોલીસ સ્ટેશન વિસ્તારમાં એક માનસિક અસ્થિર પુત્ર પોતાના પિતાના મૃતદેહ પાસે કોઈ જ જાણ વગર પાંચ દિવસ સુધી બેસી રહ્યો હોવાની ચોંકાવનારી ઘટના સામે આવી છે. ડૉ. પ્રેમ પ્રકાશ શ્રીવાસ્તવ રતનપુરના અમાન એન્ક્લેવમાં ફ્લેટ નંબર A-૩૦૪માં તેમના પુત્ર વિજય શ્રીવાસ્તવ સાથે રહેતા હતા. તેમને અર્ચના, ભાવના અને પ્રીતિ નામની ત્રણ પરણિત પુત્રીઓ છે.

આ સમગ્ર મામલો ત્યારે પ્રકાશમાં આવ્યો જ્યારે ડૉક્ટરની પુત્રી અને તેનો પુત્ર ફ્લેટ પર મળવા પહોંચ્યા હતા. ડૉક્ટરના દોહિત્ર અનમોલના જણાવ્યા અનુસાર, તેણે તાજેતરમાં જ એક નવી ગાડી ખરીદી હતી અને આ ખુશીના સમાચાર તથા મીઠાઈ આપવા માટે તે તેની માતા સાથે નાનાને ત્યાં ગયો હતો. ફ્લેટની નજીક પહોંચતા જ ત્યાંથી તીવ્ર દુર્ગંધ આવી રહી હતી.

ઘરમાં પ્રવેશતાની સાથે જ બેડ પર ડૉક્ટરનો મૃતદેહ પડેલો જોવા મળ્યો અને તેમની બાજુમાં જ તેમનો પુત્ર વિજય બેઠેલો હતો, જેને જોઈને પરિવારના હોશ ઉડી ગયા. આશરે પાંચ દિવસ પહેલા ડૉક્ટરનું મોત થયું હોવાની આશંકા વ્યક્ત કરવામાં આવી રહી છે, અને આ દરમિયાન તેમનો પુત્ર ઘરમાં જ હાજર હતો.

સ્થાનિક રહેવાસીઓના જણાવ્યા મુજબ, ફ્લેટમાંથી છેલ્લા બે દિવસથી દુર્ગંધ આવી રહી હતી, પરંતુ ડૉક્ટરના પુત્રે, જે ભાગ્યે જ કોઈને મળતો હતો, આ વિશે કોઈ પૂછપરછ કરી ન હતી. ડૉક્ટરના મૃત્યુના સમાચાર ફેલાતા જ એપાર્ટમેન્ટમાં લોકોની ભીડ ભેગી થઈ ગઈ હતી અને સૌકોઈ આશ્ચર્યમાં હતા કે પુત્ર પોતાના પિતાના મૃત્યુથી પાંચ દિવસ સુધી અજાણ કઈ રીતે રહી શકે.