ભેળસેળિયાઓ સામે કડક કાર્યવાહી કરવા આરોગ્ય મંત્રીએ અધિકારીઓને આપ્યા નિર્દેશ

ગુજરાત સરકાર દ્વારા નાગરિકોના સ્વાસ્થ્ય સાથે ચેડાં કરતા ભેળસેળિયા વેપારીઓ અને અસમાજિક તત્વો સામે કડક વલણ અપનાવવામાં આવ્યું છે. સંદેશના અહેવાલ મુજબ, સુરત ખાતે આરોગ્ય મંત્રી પ્રફુલ પાનશેરીયાની અધ્યક્ષતામાં રાજ્યના ફૂડ એન્ડ ડ્રગ્સ વિભાગના ઉચ્ચ અધિકારીઓ સાથે એક મહત્વની વર્ચ્યુઅલ બેઠક યોજાઈ હતી.

આ બેઠકમાં ખાદ્ય પદાર્થોની સ્વચ્છતા, ગુણવત્તા અને ભેળસેળ રોકવા માટે સઘન અભિયાન ચલાવવાના આદેશ આપવામાં આવ્યા હતા. મંત્રી પ્રફુલ પાનશેરીયાએ જણાવ્યું હતું કે, રાજ્યના લોકોને શુદ્ધ ખાદ્ય પદાર્થો પૂરા પાડવા એ સરકારની પ્રાથમિકતા છે. તેમણે ગુજરાતને ફૂડ સેફ્ટી અને સ્વચ્છતાના માપદંડોમાં દેશભરમાં 'રોલ મોડલ' બનાવવાનો સંકલ્પ વ્યક્ત કર્યો હતો.

બજારમાં વેચાતા હાનિકારક અને નકલી ખાદ્ય પદાર્થો સામે ઝુંબેશ તેજ કરવાની સૂચના અપાઈ છે. ખાસ કરીને ડુપ્લિકેટ ઘી તેમજ એનાલોગ બટર, ચીઝ અને પનીરની ગુણવત્તા પર કડક નજર રાખવા મંત્રીએ આદેશ કર્યો છે. ગ્રાહકોના સ્વાસ્થ્ય સાથે ચેડાં કરનારા તત્વો સામે કોઈપણ રાહત આપ્યા વગર કાયદાકીય કાર્યવાહી કરવા અને જરૂર જણાય તો ઉત્પાદન એકમો સીલ કરવા સુધીના કડક પગલાં લેવા તાકીદ કરવામાં આવી છે.