યશસ્વી જયસ્વાલે ન્યુઝીલેન્ડ એ સામે સતત બે મેચમાં સદી ફટકારી

ન્યુઝીલેન્ડ એ સામેની ટેસ્ટ શ્રેણી પહેલા ભારત એના ઓપનર યશસ્વી જયસ્વાલે શાનદાર પ્રદર્શન કરતા સતત બે મેચમાં સદી નોંધાવી છે. સ્પોર્ટસ્ટારના અહેવાલ મુજબ, લિંકન ખાતે બર્ટ સર્ટક્લિફ ઓવલ પર રમાયેલી ત્રીજી ચાર-દિવસીય મેચમાં જયસ્વાલે ૧૩૮ બોલ સામે ૧૦૨ રન કર્યા હતા.

આ મેચમાં તેણે ૧૨૭ બોલમાં પોતાની સદી પૂરી કરી હતી, જેમાં ૧૬ ચોગ્ગા અને ૨ છગ્ગાનો સમાવેશ થયો હતો. તેણે ડીન ફોક્સક્રોફ્ટ સામે સતત બે ચોગ્ગા ફટકારીને પોતાની સદી પૂર્ણ કરી હતી. જોકે, સદી બનાવ્યા બાદ તેને સ્નાયુઓમાં ખેંચાણ (ક્રેમ્પ્સ) ને કારણે તબીબી સહાય લેવી પડી હતી. રમત દરમિયાન આવેલા આ વિરામ બાદ તેની લય પર અસર પડી હોય તેમ જણાય છે, કારણ કે તે તરત જ દનરુ ફર્ન્સના બોલ પર ડ્રાઈવ મારવાનો પ્રયાસ કરતી વખતે આઉટ થયો હતો.

આ પહેલા હેગલીમાં રમાયેલી બીજી મેચમાં જયસ્વાલે ૧૫૫ રન બનાવીને અણનમ ઇનિંગ્સ રમી હતી. શ્રેણીની આ ત્રીજી મેચમાં ભારતની ટીમમાં જસપ્રીત બુમરાહ, રવીન્દ્ર જાડેજા, સાઈ સુધર્ષન, દેવદત્ત પડિક્કલ, વોશિંગ્ટન સુંદર અને પ્રસિધ કૃષ્ણ સહિત કુલ ૮ ટેસ્ટ ખેલાડીઓ સામેલ હતા.

યશસ્વી ભૂપેન્દ્ર કુમાર જયસ્વાલ ભારતીય રાષ્ટ્રીય ક્રિકેટ ટીમ માટે તમામ ફોર્મેટમાં રમે છે. તેણે જુલાઈ ૨૦૨૩માં વેસ્ટ ઈન્ડિઝ સામે પ્રથમ ટેસ્ટમાં ડેબ્યુ કર્યું હતું અને પ્રથમ ઇનિંગ્સમાં સદી ફટકારી હતી. તે ઘરેલુ ક્રિકેટમાં મુંબઈ અને આઈપીએલમાં રાજસ્થાન રોયલ્સ માટે રમે છે. ટાઈમ મેગેઝિનની ૨૦૨૫ની ટાઈમ ૧૦૦ નેક્સ્ટ યાદીમાં તેનો સમાવેશ કરવામાં આવ્યો હતો.