બાંગ્લાદેશમાં હિન્દુઓ પરના હુમલા અંગે શેખ હસીનાએ વ્યક્ત કરી ચિંતા

બાંગ્લાદેશના ભૂતપૂર્વ વડા પ્રધાન શેખ હસીનાએ બાંગ્લાદેશમાં ધાર્મિક લઘુમતીઓને નિશાન બનાવીને કરવામાં આવી રહેલા સતત હુમલાઓ અંગે ગંભીર ચિંતા વ્યક્ત કરી છે. સંદેશના અહેવાલ મુજબ, તેમણે જણાવ્યું હતું કે લઘુમતીઓના ઘરો અને પૂજા સ્થળો પર થઈ રહેલી હિંસાની ઘટનાઓને કારણે સમુદાયમાં ભયનું વાતાવરણ સર્જાયું છે અને ઘણા પરિવારો હવે દેશમાં સુરક્ષિત અનુભવી રહ્યા નથી.

આ દરમિયાન શેખ હસીનાએ જેલમાં બંધ હિન્દુ નેતા ચિન્મય કૃષ્ણ દાસના કેસનો ઉલ્લેખ કરતા તેને દુઃખદ ઘટના ગણાવી હતી. તેમણે જણાવ્યું કે ચિન્મય કૃષ્ણ દાસની માતા ગંભીર રીતે બીમાર હતા ત્યારે તેમને મળવાની મંજૂરી આપવામાં આવી ન હતી. માતાના અવસાન બાદ તેમને અંતિમ સંસ્કારમાં હાજરી આપવા માટે માત્ર ૫ કલાકનો પેરોલ આપવામાં આવ્યો હતો, જે બાબતે તેમણે પ્રશ્ન ઉઠાવ્યો હતો.

બાંગ્લાદેશ સંમિલિત સનાતની જાગરણ જોતના પ્રવક્તા ચિન્મય કૃષ્ણ દાસ હાલમાં જેલમાં છે. તેમને બે કેસમાં જામીન મળ્યા હોવા છતાં અન્ય બે કેસોને કારણે તેમની મુક્તિ અટકી છે. દાસની ધરપકડ ૨૫ નવેમ્બર, ૨૦૨૪ના રોજ ઢાકામાં કરવામાં આવી હતી અને ચિત્તાગોંગ કોર્ટે જામીન અરજી ફગાવી દીધા બાદ તેમને જેલમાં મોકલી દેવામાં આવ્યા હતા. તેમની ધરપકડના વિરોધમાં બાંગ્લાદેશ અને વિશ્વભરમાં હિન્દુ સમુદાય દ્વારા વ્યાપક વિરોધ પ્રદર્શનો કરવામાં આવ્યા હતા.

શેખ હસીના બાંગ્લાદેશના ભૂતપૂર્વ વડા પ્રધાન હતા.