દક્ષિણ ગુજરાતના આદિવાસી સમુદાય દ્વારા ધનતેરસને બદલે ધાન્યતેરસની ઉજવણી

સંદેશના અહેવાલ મુજબ, દક્ષિણ ગુજરાતના સુરત, વલસાડ, તાપી, ડાંગ, ભરૂચ અને નર્મદા જિલ્લાઓમાં વસતા આદિવાસી સમુદાયના લોકો વર્ષોની પરંપરા મુજબ દિવાળી પહેલાની તેરસને ધનતેરસને બદલે ધાન્યતેરસ તરીકે ઉજવે છે. આ તહેવાર મુખ્યત્વે ખરીફ પાકની લણણીની ખુશીમાં મનાવવામાં આવે છે.

આદિવાસી સમાજ સદીઓથી ડાંગર સહિતના પાકની લણણી સાથે ચંદ્ર, સૂર્ય, જીવન ટકાવી રાખવાના સાધનો, સ્વરક્ષણના શસ્ત્રો અને પ્રકૃતિની પૂજા કરતો આવ્યો છે. આ તહેવાર દરમિયાન ખેડૂત અને પશુપાલકો તેમના પૂર્વજોના રીત-રિવાજો મુજબ પ્રકૃતિ અને પૂર્વજોની પૂજા કરવાની સાથે લક્ષ્મીપૂજન પણ કરે છે.

ઉજવણીના ભાગરૂપે દિવાળીના દિવસે દરેક ખેતરમાં, કૂવામાં, પશુઓને બાંધવાની જગ્યાએ, કોઠાર, ઘરના દરવાજા તેમજ ઘર અને ગોયામાં દીવા પ્રગટાવવામાં આવે છે. પરંપરાગત રીતે આ દિવસે ઘઉંના લોટમાંથી બનેલી વાનગીઓ, વડા, પકોડા અને મિર્ચી વડા જેવી વસ્તુઓ બનાવવામાં આવતી હતી, પરંતુ હાલમાં નવી પરંપરા મુજબ ખીર-પુરી અને ગુલાબ જામુન જેવી વાનગીઓ પણ તૈયાર કરવામાં આવે છે.