ચીન-લદ્દાખ સરહદ પાસે ૫.૦ ની તીવ્રતાનો ભૂકંપ અનુભવાયો

ચીન અને લદ્દાખની સરહદ નજીક ગુરુવારે રાત્રે ૧૦:૨૬ કલાકે ૫.૦ ની તીવ્રતાનો ભૂકંપ નોંધાયો હતો. આ ભૂકંપના ધ્રુજારી જમ્મુ-કાશ્મીરના કેટલાક વિસ્તારોમાં પણ અનુભવાઈ હતી. 'કાશ્મીર વેધર'ના અહેવાલ મુજબ, ભૂકંપનું કેન્દ્ર ચીનના સિંજિયાંગ પ્રદેશમાં ૩૫.૫૮૭ ડિગ્રી ઉત્તર અક્ષાંશ અને ૭૮.૧૩૦ ડિગ્રી પૂર્વ રેખાંશ પર, જમીનથી ૧૬૪ કિલોમીટરની ઊંડાઈએ હતું.

ભૂકંપની તીવ્રતા મધ્યમ હતી અને તેનું કેન્દ્ર ઊંડાઈ પર હોવાને કારણે મોડી રાત સુધીમાં કોઈ મોટા નુકસાન અથવા જાનહાનીના સમાચાર મળ્યા નથી. આ ઉપરાંત, ગુરુવારે દેશના અન્ય ભાગોમાં પણ ભૂકંપના હળવા ધ્રુજારી અનુભવાયા હતા. નેશનલ સેન્ટર ફોર સિસ્મોલોજી (NCS) મુજબ, સાંજે ૬:૩૩ કલાકે દિલ્હી-NCRના ફરીદાબાદમાં ૨.૯ ની તીવ્રતાનો અને સાંજે ૭:૫૪ કલાકે લક્ષદ્વીપના સમુદ્રમાં ૩.૨ ની તીવ્રતાનો ભૂકંપ આવ્યો હતો. તીવ્રતા ખૂબ ઓછી હોવાને કારણે મોટાભાગના લોકોને આ ધ્રુજારીનો અનુભવ થયો ન હતો.

છેલ્લા કેટલાક મહિનાઓથી તિબેટના ઉચ્ચપ્રદેશ અને આસપાસના હિમાલયના વિસ્તારોમાં ભૂકંપની પ્રવૃત્તિમાં ચિંતાજનક વધારો જોવા મળી રહ્યો છે. અગાઉ ૨૨ ઓક્ટોબરના રોજ લસાથી ૪૦૦ કિલોમીટર દૂર તિબેટમાં ૭.૦ ની તીવ્રતાનો વિનાશક ભૂકંપ નોંધાયો હતો, જેનું કેન્દ્ર ૧૭૩ કિલોમીટર ઊંડાઈએ હતું. હાલમાં સમગ્ર હિમાલય ક્ષેત્ર સતત કુદરતી આપત્તિઓનો સામનો કરી રહ્યું છે. ઓગસ્ટ મહિનામાં નેપાળ-તિબેટ સરહદ પાસે ગ્લેશિયર અને ખડકો તૂટવાને કારણે વિનાશક પૂર આવ્યું હતું, જેમાં નેપાળમાં ૧,૪૫૫ થી વધુ લોકોએ જીવ ગુમાવ્યા હતા અને હજારો લોકો ગુમ થયા હતા.

પર્યાવરણ નિષ્ણાતો માને છે કે વૈશ્વિક તાપમાનમાં વધારો થવાને કારણે ગ્લેશિયર્સનું ઝડપથી પીગળવું અને હવામાનમાં અણધાર્યા ફેરફારોને લીધે ક્િંગહાઈ-તિબેટ ઉચ્ચપ્રદેશ અને સમગ્ર હિમાલય ક્ષેત્રમાં આવી કુદરતી આપત્તિઓનું જોખમ સતત વધી રહ્યું છે.