સંઘવીએ 129 જાપાની કંપનીઓ સાથે રોકાણની ચર્ચા કરી

ગુજરાતના નાયબ મુખ્યમંત્રી શ્રી હર્ષ સંઘવીએ ગુજરાત સરકારના પ્રતિનિધિમંડળનું નેતૃત્વ કરતાં જાપાનની કંપનીઓના પ્રતિનિધિઓ સાથે એક જ દિવસમાં બે મેગા રાઉન્ડ ટેબલ બેઠકો યોજી અને કુલ 129 જાપાની કંપનીઓ સાથે ચર્ચા કરી. તેમણે સુઝુકી મોટર કોર્પોરેશનના પ્રમુખ શ્રી તોશિહિરો સુઝુકી, જાપાનના વિદેશ રાજ્યમંત્રી શ્રી નાકાસોને યાસુતાકા અને ઇવાતે પ્રીફેક્ચરના ગવર્નર શ્રી તાકુયા તાસ્સો સાથે પણ મુલાકાત કરી.

ટોક્યોની હોટેલ ઇમ્પિરિયલ ખાતે યોજાયેલી લંચ રાઉન્ડ ટેબલ બેઠકમાં વિવિધ ક્ષેત્રોના 57 અગ્રણી જાપાની ઉદ્યોગપતિઓએ ભાગ લીધો હતો. શ્રી સંઘવીએ ગુજરાતને ભારતમાં રોકાણ માટે અનુકૂળ રાજ્ય તરીકે રજૂ કરતાં તૈયાર જમીન, વિશ્વસ્તરીય બંદરો, વિશ્વસનીય વીજ પુરવઠો અને ઝડપી મંજૂરી પ્રક્રિયાની માહિતી આપી હતી.

બીજી બેઠકમાં સુઝુકીની ઓટોમોબાઈલ સપ્લાય ચેઇન સાથે સંકળાયેલા 72 સપ્લાયર્સ જોડાયા હતા. તેમાં 24 નવા સપ્લાયર્સે હાંસલપુર ખાતેના સુઝુકી પ્લાન્ટની નજીક ઝડપથી એકમો સ્થાપવામાં રસ દર્શાવ્યો હતો. ગુજરાતમાં સુઝુકીનું વાર્ષિક ઉત્પાદન 10 લાખ કારનું છે અને આગામી વર્ષોમાં તેને 20 લાખ કાર સુધી પહોંચાડવાની યોજના છે.

દિવસ દરમિયાન સુમિતોમો કેમિકલ, ફુરુકાવા ઇલેક્ટ્રિક, હોન્ડા, ટોક્યો ઇલેક્ટ્રોન, ક્યોવા લેધર, જેઇઆરએ, એમયુએફજી બેંક, મારુબેની, સાનરિયો, મેરાકુ અને મોરિરિન સહિતની 11 અગ્રણી જાપાની કંપનીઓના પ્રતિનિધિઓ સાથે પણ મુલાકાત થઈ.

સુમિતોમો કેમિકલએ ભાવનગરમાં સેમિકન્ડક્ટર ક્ષેત્ર માટે વિશિષ્ટ કેમિકલ્સનું ઉત્પાદન એકમ સ્થાપવાનો નિર્ણય લીધો છે. ટોક્યો ઇલેક્ટ્રોન સાથે સેમિકન્ડક્ટર ક્ષેત્રમાં પ્રોજેક્ટ સ્થાપવા અંગે અંતિમ તબક્કાની ચર્ચા ચાલી રહી છે. ફુરુકાવા ઇલેક્ટ્રિક ડેટા સેન્ટર્સ માટે ઓપ્ટિકલ ફાઇબર કેબલના ઉત્પાદન એકમ માટે ₹4,500 કરોડથી વધુના રોકાણ અંગે અંતિમ તબક્કાની ચર્ચા કરી રહી છે. આ ઉત્પાદન જાપાનની બહાર પ્રથમ વખત થશે. તેનાથી આર્ટિફિશિયલ ઇન્ટેલિજન્સ (AI) અને ડેટા સેન્ટર ક્ષેત્રને વેગ મળવાની અપેક્ષા છે.

ક્યોવા લેધરે ગુજરાતમાં માનવસર્જિત (PU) લેધરનું ઉત્પાદન એકમ સ્થાપવા સંમતિ આપી છે અને તેના માટે એક મહિનાની અંદર જમીન નક્કી કરાશે. હોન્ડાએ ગુજરાતમાં વિસ્તરણ યોજનાના ભાગરૂપે વર્ષ 2027ના અંત સુધીમાં અથવા વર્ષ 2028ની શરૂઆતમાં 4,000 નવી રોજગારીની તકો ઊભી કરવાની યોજના દર્શાવી છે.

શ્રી સંઘવીએ જણાવ્યું હતું કે જાપાનના નેતાઓ ભારત વિશે વિચારે ત્યારે તેમના મનમાં સૌથી પહેલાં પ્રધાનમંત્રી શ્રી નરેન્દ્ર મોદીજીનું નામ આવે છે. ગુજરાતના મુખ્યમંત્રી તરીકેના તેમના કાર્યકાળ અને જાપાનના સ્વર્ગસ્થ પૂર્વ પ્રધાનમંત્રી શ્રી શિન્ઝો આબે સાથેની ગાઢ મિત્રતાથી જાપાન સાથે આત્મીયતા અને વિશ્વાસનું બંધન ઊભું થયું છે, જેના કારણે ગુજરાત જાપાન માટે ભારતમાં રોકાણનું પ્રથમ પસંદગીનું સ્થળ બન્યું છે. તેમણે ઉમેર્યું કે મુખ્યમંત્રી શ્રી ભૂપેન્દ્ર પટેલજીના નેતૃત્વમાં આ વિશ્વાસ ગુજરાતના યુવાનો માટે ઉદ્યોગો, રોકાણ અને રોજગારીની તકોમાં પરિવર્તિત થઈ રહ્યો છે.