તંત્રએ વિરમગામ-વઢવાણ ફોરલેન માર્ગનું ડામર કામ ઝડપથી આગળ ધપાવ્યું

ચોમાસાની ઋતુ દરમિયાન સ્થગિત કરવામાં આવેલી વિરમગામ - વઢવાણ ફોરલેન રોડના નિર્માણની કામગીરી વરસાદી ઋતુ પૂર્ણ થતાં ફરી ઝડપભેર શરૂ કરવામાં આવી છે.

માર્ગ અને મકાન પેટા વિભાગ, વિરમગામ દ્વારા માર્ગ પર ડામર કામ પૂર્ણ ત્વરાથી હાથ ધરાયું છે. સ્થળ પર ડામર પાથરવાનાં આધુનિક મશીનો અને રોલરની મદદથી ગુણવત્તાયુક્ત રોડ બનાવવાની કામગીરી ચાલી રહી છે. ચોમાસામાં ભારે વરસાદની શક્યતાઓને ધ્યાનમાં રાખીને વાહનવ્યવહાર અને રોડની ગુણવત્તા જળવાઈ રહે તે હેતુથી કામ સામયિક રીતે અટકાવવામાં આવ્યું હતું. વાતાવરણ સાનુકૂળ થતાં જ તંત્રએ કામગીરી ફરી શરૂ કરી છે.

ફોરલેન ડામર રોડનું કામ ઝડપથી પૂર્ણ થતાં વિરમગામ, વઢવાણ અને આસપાસના વિસ્તારોમાંથી પસાર થતાં દૈનિક હજારો વાહનચાલકો તથા રાહદારીઓને સુગમ અને સુરક્ષિત વાહનવ્યવહારનો લાભ મળશે. રોડ બનવાથી સમય અને બળતણની બચત થશે તેમજ ખાડાઓ અને ટ્રાફિકની સમસ્યામાંથી વાહનચાલકોને મોટી મુક્તિ મળશે.

માર્ગ અને મકાન પેટા વિભાગે કામગીરી વહેલી તકે પૂર્ણ કરી માર્ગને વાહનવ્યવહાર માટે પુનઃ કાર્યરત કરવાનો લક્ષ્યાંક રાખ્યો છે.