મોરબીમાં રેઇડ કરી સપ્ટેમ્બરમાં ૯ તરુણ શ્રમયોગીઓને મુક્ત કરાયા

મોરબી :: જિલ્લામાં બાળમજૂરી રોકવા અને નાની વયનાં બાળકોના અધિકારોનું રક્ષણ કરવાના હેતુથી જિલ્લા ટાસ્ક ફોર્સ કમિટીના અધ્યક્ષ તથા જિલ્લા કલેક્ટરશ્રીના માર્ગદર્શન હેઠળ મદદનીશ શ્રમ આયુક્તની કચેરી દ્વારા સઘન ઝુંબેશ હાથ ધરવામાં આવી રહી છે.

સપ્ટેમ્બર-૨૦૨૬ માસ દરમિયાન બાળમજૂરી વિરોધી ટાસ્કફોર્સે મોરબી અને ટંકારા વિસ્તારમાં આકસ્મિક રેઇડ પાડી હતી. તા. ૦૮/૦૯/૨૦૨૬ના રોજ ટંકારા ખાતે આવેલી 'હિમાલય ફ્રેમ એલએલપી'માંથી ૮ તરુણ શ્રમયોગીઓને બાળમજૂરીમાંથી મુક્ત કરાવવામાં આવ્યા હતા. ત્યારબાદ તા. ૨૨/૦૯/૨૦૨૬ના રોજ મોરબી ખાતે 'દેવુભાઈ ગાંઠિયાવાળા'ની સંસ્થામાંથી ૧ તરુણ શ્રમયોગીને મુક્ત કરવામાં આવ્યો હતો. આમ, સપ્ટેમ્બર માસમાં કુલ ૯ બાળકોને મુક્ત કરાવી બંને સંસ્થાઓ વિરુદ્ધ કાયદા અનુસાર કડક કાર્યવાહી હાથ ધરવામાં આવી છે.

રેઇડ દરમિયાન જિલ્લાના તમામ હોટલ, ઢાબા અને ઔદ્યોગિક એકમોના સંચાલકોને પોતાની સંસ્થામાં ક્યારેય બાળ શ્રમિકોને કામે ન રાખવા કડક સૂચના આપવામાં આવી છે. આગામી સમયમાં પણ આવી ઝુંબેશ અને કડક કાર્યવાહી સતત ચાલુ રહેશે. જિલ્લામાં કોઈ સ્થળે બાળમજૂરી થતી નજરે પડે તો મદદનીશ શ્રમ આયુક્તની કચેરી, મોરબી અથવા ચાઈલ્ડ હેલ્પલાઈન નંબર ૧૦૯૮ પર ત્વરિત જાણ કરવા નાગરિકોને મદદનીશ શ્રમ આયુક્ત, મોરબીની યાદી દ્વારા અનુરોધ કરવામાં આવ્યો છે.