મુખ્યમંત્રીએ ‘ગુજરાત દીપોત્સવી અંક વિક્રમ સંવત- ૨૦૮૨’નું વિમોચન કર્યું

મુખ્યમંત્રી શ્રી ભૂપેન્દ્ર પટેલે ગુજરાતના સાહિત્ય, કલા અને સંસ્કારના વારસાને ઉજાગર કરતા ‘ગુજરાત દીપોત્સવી અંક વિક્રમ સંવત ૨૦૮૨’નું વિમોચન કર્યું હતું. રાજ્યના માહિતી ખાતા દ્વારા દર વર્ષે પોતાની આગવી પરંપરા અનુસાર ‘ગુજરાત દીપોત્સવી અંક’ પ્રસિદ્ધ કરવામાં આવે છે.

આ વર્ષે અંકમાં ગુજરાતના મુર્ધન્ય સાહિત્યકારોની સર્જનશીલ કલમે રજૂ થયેલા ચિંતનાત્મક લેખો, કાવ્યો, નવલિકાઓ, વિનોદિકાઓ અને નાટિકાઓનો સાહિત્ય રસથાળ પીરસવામાં આવ્યો છે. સર્વશ્રી ગુણવંતભાઈ શાહ, વિષ્ણુભાઈ પંડયા, ડૉ. કુમારપાળ દેસાઈ, રઘુવીરભાઈ ચૌધરી, શાહબુદ્દીન રાઠોડ, રતિલાલ બોરીસાગર, માધવ રામાનુજ અને રાજેન્દ્ર શુક્લની સાહિત્યકૃતિઓ અંકમાં પ્રસિદ્ધ કરવામાં આવી છે.

આ દળદાર અંકમાં ૨૮ અભ્યાસલેખો, ૨૮ નવલિકાઓ, ૧૬ વિનોદિકાઓ, ૯ નાટિકા અને ૮૯ જેટલી કાવ્ય રચનાઓ છે. પ્રકૃતિ, લોકજીવન અને માનવીય સંવેદનાઓને અભિવ્યક્ત કરતી ૫૨ જેટલી રંગીન તસવીરો અને મનમોહક ચિત્રોએ અંકને વધુ નયનરમ્ય બનાવ્યો છે.

આ પ્રસંગે રાજ્યના મુખ્ય સચિવશ્રી એમ.કે.દાસ, અગ્ર સચિવ શ્રી સંજીવ કુમાર, માહિતી અને પ્રસારણ વિભાગના સચિવ શ્રી વિક્રાંત પાંડે, અધિક માહિતી નિયામક ડૉ. સંજય કચોટ તથા સંયુક્ત માહિતી નિયામક શ્રી જયેશ દવે સહિત માહિતી ખાતાનાં ઉચ્ચ અધિકારીઓ ઉપસ્થિત રહ્યા હતાં.