એલાઈડ અને હેલ્થકેર પ્રોફેશનલ્સ માટે નવું રજિસ્ટ્રેશન માળખું પ્રસ્તાવિત

કેન્દ્રીય આરોગ્ય મંત્રાલય હેઠળની નેશનલ કમિશન ફોર એલાઈડ એન્ડ હેલ્થકેર પ્રોફેશન્સ (NCAHP) એ એલાઈડ અને હેલ્થકેર પ્રોફેશનલ્સના રજિસ્ટ્રેશન માટે વ્યાપક નિયમનકારી માળખું પ્રસ્તાવિત કર્યું છે. ધ હિન્દુના અહેવાલ મુજબ, આ નવા માળખામાં કૌશલ્ય અપગ્રેડ કરવા, ક્ષમતાનું મૂલ્યાંકન કરવા અને નિયમિત રજિસ્ટ્રેશનમાં પરિવર્તન માટેના માર્ગો સામેલ છે.

આ પ્રસ્તાવિત નિયમોનો મુખ્ય ઉદ્દેશ્ય વ્યાવસાયિક રજિસ્ટ્રેશનમાં એકરૂપતા, પારદર્શિતા અને જવાબદારી લાવવાનો છે. આરોગ્ય મંત્રાલય દ્વારા જારી કરવામાં આવેલી યાદી મુજબ, પ્રેક્ટિશનરો નિર્ધારિત ધોરણો મુજબ તેમની ક્ષમતાઓમાં વધારો કરી શકશે. NCAHP એ નેશનલ કમિશન ફોર એલાઈડ એન્ડ હેલ્થકેર પ્રોફેશન્સ એક્ટ, ૨૦૨૧ હેઠળ તૈયાર કરાયેલા 'ડ્રાફ્ટ પ્રોવિઝનલ રજિસ્ટ્રેશન ઓફ એલાઈડ એન્ડ હેલ્થકેર પ્રોફેશનલ્સ રેગ્યુલેશન્સ, ૨૦૨૬' પર જાહેર અને હિતધારકો પાસેથી અભિપ્રાયો મંગાવ્યા છે.

નિયમોની મુખ્ય વિશેષતાઓમાં NCAHP એક્ટ, ૨૦૨૧ અનુસાર કામચલાઉ (પ્રોવિઝનલ) રજિસ્ટ્રેશન માટે પ્રમાણિત પદ્ધતિની સ્થાપનાનો સમાવેશ થાય છે. આરોગ્ય મંત્રાલ્યના નિવેદન અનુસાર, આ નિયમો પાત્ર પ્રોવિઝનલ રજિસ્ટર્ડ વ્યાવસાયિકોને કૌશલ્ય વધારવા માટે નિર્ધારિત બ્રિજ કોર્સ, દેખરેખ હેઠળ તાલીમ અને જરૂર જણાય ત્યાં લઘુત્તમ લાયકાત પરીક્ષાઓ લેવાની તક પૂરી પાડશે, જેથી તેઓ નિયમિત રજિસ્ટ્રેશનની જરૂરિયાતો પૂરી કરી શકે.

આ ક્ષમતા આધારિત અભિગમનો હેતુ વ્યાવસાયિક વિકાસ અને કારકિર્દીમાં પ્રગતિ સુલભ બનાવવાનો તેમજ આરોગ્ય સેવાઓની ગુણવત્તા સુધારવાનો છે. આરોગ્ય મંત્રાલ્યના એક વરિષ્ઠ અધિકારીએ જણાવ્યું હતું કે, પ્રસ્તાવિત માળખું કૌશલ્ય વિકાસ, વ્યાવસાયિક ક્ષમતા અને નિયમનકારી જવાબદારી પર ભાર મૂકે છે. નિયમિત રજિસ્ટ્રેશન સાથે પ્રગતિને નિર્ધારિત જરૂરિયાતો સાથે જોડીને, આ નિયમો એ સુનિશ્ચિત કરવાનો પ્રયાસ કરે છે કે વ્યાવસાયિકો પાસે ગુણવત્તાયુક્ત સેવાઓ આપવા માટે જરૂરી જ્ઞાન અને ક્લિનિકલ ક્ષમતા હોય.

અરજી સબમિટ કરવા, પ્રમાણપત્રો ચકાસવા, પાત્રતા નક્કી કરવા અને કામચલાઉ રજિસ્ટ્રેશન પ્રમાણપત્રો ઇશ્યૂ કરવા માટે એક સંકલિત ઓનલાઇન રજિસ્ટ્રેશન સિસ્ટમનો પણ પ્રસ્તાવ છે. પાત્ર વ્યાવસાયિકોને પ્રોવિઝનલ રજિસ્ટ્રેશન મળતા તેમને 'પ્રોવિઝનલ રજિસ્ટ્રેશન યુનિક આઈડેન્ટિફિકેશન નંબર' (PR UID) આપવામાં આવશે. આ ડિજિટલ પ્લેટફોર્મ પ્રક્રિયાઓને સરળ બનાવશે અને રાજ્યો તથા કેન્દ્રશાસિત પ્રદેશોમાં સમાન કાર્યક્ષમતા વધારશે.

નિયમોમાં કામચલાઉ રજિસ્ટ્રેશન માટેના પ્રમાણિત માપદંડો, ઓનલાઇન અરજી અને પ્રમાણપત્ર ઇશ્યૂ કરવાની પ્રક્રિયા, તેની માન્યતા, લંબાવવા, સમાપ્તિ અને અપીલ અંગેની જોગવાઈઓનો સમાવેશ થાય છે. આ ઉપરાંત, બ્રિજ કોર્સ, ક્ષમતા મૂલ્યાંકન, ક્લિનિકલ તાલીમ અને કેન્દ્રીય અથવા રાજ્ય રજિસ્ટરમાં નિયમિત રજિસ્ટ્રેશનમાં પરિવર્તનની સુવિધાઓ પણ આપવામાં આવી છે. NCAHP એ એલાઈડ અને હેલ્થકેર પ્રોફેશનલ્સ, સંસ્થાઓ, નિષ્ણાતો અને સામાન્ય જનતા પાસેથી ૪ ડિસેમ્બર, ૨૦૨૬ સુધીમાં અભિપ્રાયો મંગાવ્યા છે.

NCAHP હેઠળ આવતા વ્યવસાયોમાં ક્લિનિકલ લેબોરેટરી, સર્જિકલ અને ઇમરજન્સી ટેકનોલોજી, ફિઝિયોથેરાપી, ન્યુટ્રિશન, ઓપ્થાલમોલોજી, ઓક્યુપેશનલ થેરાપી, કોમ્યુનિટી અને બિહેવિયરલ હેલ્થ, મેડિકલ ઇમેજિંગ, ફિઝિશિયન એસોસિએટ્સ અને હેલ્થ ઇન્ફોર્મેટિક્સનો સમાવેશ થાય છે.

નેશનલ કમિશન ફોર એલાઈડ એન્ડ હેલ્થકેર પ્રોફેશન્સ એ નેશનલ કમિશન ફોર એલાઈડ એન્ડ હેલ્થકેર પ્રોફેશન્સ એક્ટ, ૨૦૨૧ હેઠળ કાર્યરત એક સંસ્થા છે.