રાજકોટમાં દિવાળીના પર્વે જૂની કારના ૩૦ થી ૩૫ કરોડના વેપારની આશા

રાજકોટના નવા ૧૫૦ ફૂટ રિંગ રોડ પર નાના મૌવા પાસે આવેલા જૂની કારના બજારમાં દિવાળીના તહેવારોને ધ્યાનમાં રાખીને રૂ. ૩૦ થી ૩૫ કરોડ સુધીના વેપારની અપેક્ષા રાખવામાં આવી રહી છે. આ વિસ્તારમાં જૂની કારની લે-વેચ કરતા અંદાજે ૪૦ જેટલા ડેલો આવેલા છે. જોકે, આ વર્ષે વરસાદ ન પડવાને કારણે બજારમાં થોડી મંદી જોવા મળી રહી છે. સૌરાષ્ટ્રના વિવિધ તાલુકાઓમાંથી લોકો અહીં જૂની કાર ખરીદવા માટે આવે છે.

વેપારી કુમારભાઈ ચૌહાણના જણાવ્યા અનુસાર, તેઓ છેલ્લા ૨૫ વર્ષથી આ વ્યવસાય સાથે જોડાયેલા છે. તેમણે શરૂઆતમાં ડેન્ટિંગ-પેઇન્ટિંગ અને જીપ્સી કે ફ્રન્ટી જેવી ગાડીઓમાં મોડિફિકેશનનું કામ કરતા હતા. શોખીન ગ્રાહકોની માંગ જોઈ તેમણે જૂની કારનો ડેલો શરૂ કર્યો હતો.

બીજી તરફ, અર્જુનભાઈ ચૌહાણના મતે અહીં બજેટ ફ્રેન્ડલી કારથી લઈને લક્ઝરી કાર સુધીના તમામ વિકલ્પો ઉપલબ્ધ છે. તેમણે નોંધ્યું કે છેલ્લા ચાર વર્ષથી સેમી એક્સયુવી અને એક્સયુવીની માંગ વધી છે, જ્યારે અગાઉ સેડાન કારનો ક્રેઝ હતો. તેમણે ગ્રાહકોને સોશિયલ મીડિયા દ્વારા ખરીદી કરતી વખતે છેતરપિંડીથી સાવચેત રહેવાની સલાહ આપી હતી અને ઓનલાઇન બજારમાં વ્યક્તિગત માર્ગદર્શન અને વિશ્વાસ હોવો જરૂરી છે તેમ જણાવ્યું હતું.