નરનલાલા લો કોલેજમાં વિકસિત ભારત યુવા સંવાદ કાર્યક્રમ યોજાયો

પીઆઈબી અમદાવાદના અહેવાલ મુજબ, ભારત સરકારના યુવા બાબતો અને રમતગમત મંત્રાલયના માય ભારત (MY Bharat) દ્વારા નવસારીની નરનલાલા લો કોલેજમાં ‘વિકસિત ભારત યુવા સંવાદ’નું આયોજન કરવામાં આવ્યું હતું. આ કાર્યક્રમનો હેતુ યુવાનોમાં લોકશાહી મૂલ્યો, સામાજિક જવાબદારી અને નેતૃત્વના ગુણો વિકસાવવાની સાથે રાષ્ટ્રનિર્માણમાં તેમની સક્રિય ભાગીદારી વધારવાનો હતો. આ સાથે જ વિદ્યાર્થીઓને વિકસિત ભારત@૨૦૪૭ના રાષ્ટ્રીય સંકલ્પથી જોડીને દેશના વિકાસમાં તેમની ભૂમિકા વિશે જાગૃત કરવામાં આવ્યા હતા.

આ પ્રસંગે મુખ્ય અતિથિ તરીકે નવસારી જિલ્લા ભાજપ પ્રમુખ ભૂરાભાઈ શાહ ઉપસ્થિત રહ્યા હતા. તેમણે યુવા પેઢીને સંબોધતા સમાજ પ્રત્યેની પ્રતિબદ્ધતા, જવાબદાર નાગરિકત્વ અને રાષ્ટ્રના સર્વાંગી વિકાસમાં યુવાનોના મહત્વ પર ભાર મૂક્યો હતો. કાર્યક્રમમાં કોલેજના ચેરમેન મહેશભાઈ કણસારા અને આચાર્ય ડૉ. કેતના ચાંપાનેરી પણ હાજર હતા.

જિલ્લા યુવા અધિકારી (DYO) અમૃતા સુરાણાએ યુવાનોને માય ભારતની વિવિધ પહેલો અને કાર્યક્રમોની જાણકારી આપી હતી. તેમણે યુવાનોને પોતાની કૌશલ્ય અને ક્ષમતાઓ વધારીને રાષ્ટ્રના વિકાસમાં યોગદાન આપવા માટે પ્રોત્સાહિત કર્યા હતા. આ સમગ્ર કાર્યક્રમનું આયોજન જિલ્લા માય ભારત કાર્યાલય, નવસારી દ્વારા અમૃતા સુરાણાના નેતૃત્વમાં કરવામાં આવ્યું હતું.

યુથ આઇકન લકી સિંહે યુવાનો સાથે ચર્ચા કરી હતી. તેમણે શિસ્ત, આત્મવિશ્વાસ, સતત પ્રયત્નો, વ્યક્તિગત વિકાસ અને લક્ષ્યો પ્રત્યેની પ્રતિબદ્ધતા વિશે પોતાના વિચારો રજૂ કર્યા હતા, જેથી વિદ્યાર્થીઓ પોતાની ક્ષમતા ઓળખી જીવનમાં સકારાત્મક બદલાવ લાવી શકે.

આ કાર્યક્રમમાં મોટી સંખ્યામાં યુવા સહભાગીઓ અને કોલેજના વિદ્યાર્થીઓએ ઉત્સાહપૂર્વક ભાગ લીધો હતો. આ મંચ દ્વારા યુવાનોએ સામાજિક અને રાષ્ટ્રીય મુદ્દાઓ પર પોતાના વિચારો વ્યક્ત કર્યા હતા અને અનુભવોની આપ-લે કરી હતી. માય ભારત દ્વારા આવા પ્રયાસો દ્વારા યુવાનોને નેતૃત્વના ગુણો વિકસાવવા અને ૨૦૪૭ના લક્ષ્ય સુધી પહોંચવામાં સહભાગી બનાવવામાં આવે છે.