તેલંગાણાના MLC ને ડીપફેક વીડિયોથી ડરાવી ₹૫ કરોડ માંગતા ૬ ધરપકડ

તેલંગાણા વિધાનસભા પરિષદના સભ્ય (MLC) મિર્ઝા રહમત બેગ પાસેથી પૈસા પડાવવા માટે ડીપફેક વીડિયો અને મોર્ફ કરેલા ફોટાનો ઉપયોગ કરી ધમકી આપનારા ૬ વ્યક્તિઓની નરસિંગી પોલીસે ધરપકડ કરી છે. ધ હિંદુના અહેવાલ મુજબ, આરોપીઓએ શરૂઆતમાં ₹૫ કરોડની માંગણી કરી હતી અને ત્યારબાદ તેઓ ₹૪.૭ લાખ ઉઘરાવવામાં સફળ થયા હતા.

પોલીસે જે લોકોની ધરપકડ કરી છે તેમની ઓળખ ૩૫ વર્ષીય મોહમ્મદ મોહસિન ખાન, ૨૯ વર્ષીય ફાતિમા બેગમ ઉર્ફે રીમા, ૨૦ વર્ષીય મોહમ્મદ સમીર, ૨૦ વર્ષીય મોહમ્મદ ઝમીર, ૧૮ વર્ષીય મોહમ્મદ ઇમરાન અને ૨૦ વર્ષીય સૈયદ રહેાન તરીકે થઈ છે. આ તમામ આરોપીઓ હૈદરાબાદના બંદલગુડા, ચાંદરાયંગુટ્ટા અને બરકાસ વિસ્તારના રહેવાસીઓ છે.

પોલીસ તપાસમાં બહાર આવ્યું છે કે, આ આરોપીઓએ અન્ય કેટલાક ફરાર સાથીદારો સાથે મળીને આ કાવતરાનું આયોજન કર્યું હતું. આર્થિક તંગી દૂર કરવા અને ઝડપથી પૈસા કમાવવાના ઈરાદાથી તેમણે MLC મિર્ઝા રહમત બેગને નિશાન બનાવ્યા હતા. આરોપીઓએ બેગને ધમકી આપી હતી કે જો તેઓ માંગણી મુજબના પૈસા નહીં આપે, તો તેમના વાંધાજનક મોર્ફ કરેલા ફોટા અને ડીપફેક વીડિયો સોશિયલ મીડિયા પર વાયરલ કરવામાં આવશે. આનાથી તેમની રાજકીય અને સામાજિક પ્રતિષ્ઠાને નુકસાન થશે અને તેમના જીવનને પણ જોખમ ઊભું થઈ શકે છે તેવી ચેતવણી આપવામાં આવી હતી.

ઘટનાક્રમ મુજબ, ૫ નવેમ્બરના રોજ ફાતિમા બેગમ, સમીર, ઝમીર, ઇમરાન અને રહેાન ઇબ્રાહિમ બાગ સ્થિત MLC ની ઓફિસે ગયા હતા. ત્યાંથી ફાતિમા બેગમે એક કોટન બોક્સમાં રોકડા ₹૪ લાખ એકત્ર કર્યા હતા. પોલીસને મળેલી ચોક્કસ માહિતીના આધારે, જ્યારે આ જૂથ ઘટનાસ્થળેથી નીકળી રહ્યું હતું ત્યારે પોલીસે તેમને વચ્ચેથી રોકીને પાંચેય આરોપીઓની ધરપકડ કરી લીધી હતી. ત્યારબાદ હાથ ધરી કરવામાં આવેલા ઓપરેશન દરમિયાન મોહસિન ખાનની પણ ધરપકડ કરવામાં આવી હતી.

આ કેસમાં પોલીસે કુલ ₹૪.૭ લાખ રોકડા, બે ઓટોરિક્ષા, ૬ મોબાઈલ ફોન અને એક લેપટોપ જપ્ત કર્યું છે. પોલીસના જણાવ્યા અનુસાર, આ રોકડ રકમ ખંડણીના ભાગરૂપે એકત્ર કરવામાં આવી હતી.

તપાસકર્તાઓએ જણાવ્યું કે આ ગેંગના કેટલાક સભ્યો મોર્ફ કરેલા ફોટા અને ડીપફેક વીડિયો મેળવવા અને તેનો ઉપયોગ કરી MLC ને ડરાવવા માટે જવાબદાર હતા, જ્યારે અન્ય કેટલાક સભ્યો આ સામગ્રીને વિવિધ સોશિયલ મીડિયા એકાઉન્ટ્સ દ્વારા ફેલાવવામાં સામેલ હતા. હાલમાં પોલીસ બાકીના આરોપીઓની ધરપકડ કરવા અને આ કાવતરા તેમજ સામગ્રીના પ્રસારમાં સામેલ અન્ય વ્યક્તિઓની ઓળખ કરવા માટે પ્રયત્નો કરી રહી છે. આ મામલે વધુ તપાસ ચાલુ છે.