IPL ખેલાડીઓ રિટેન્શન માટે ૪૦ કરોડ રૂપિયાની મોટી માંગ કરી રહ્યા છે

ઇન્ડિયન પ્રીમિયર લીગ (IPL) ની આગામી સીઝન પહેલાં ફ્રેન્ચાઇઝીઓ સામે મોટો આર્થિક પડકાર ઊભો થઈ શકે છે. ક્રિકબઝના અહેવાલ મુજબ, ટીમ ઇન્ડિયાના કેટલાક ટોચના ભારતીય ખેલાડીઓએ પોતાની ફ્રેન્ચાઇઝીઓને સ્પષ્ટ કરી છે કે જો તેમને રિટેન કરવા માટે ૪૦ કરોડ રૂપિયા સુધીની રકમ આપવામાં આવશે તો જ તેઓ ટીમમાં ટકી રહેશે.

ખેલાડીઓનું માનવું છે કે જો તેઓ રિટેન્શનના બદલે હરાજીમાં ભાગ લેશે, તો તેમને અત્યારની રકમ કરતા પણ વધુ મોટો કોન્ટ્રાક્ટ મળી શકે છે. આથી જ કેટલાક ખેલાડીઓ હાલની રિટેન્શન પદ્ધતિને બદલે ઓક્શન માર્કેટમાં પોતાની કિંમત ચકાસવા માંગે છે.

ખેલાડીઓની આ માંગ પાછળ શ્રેયસ ઐયર અને ઋષભ પંતના તાજેતરના ઉદાહરણો જવાબદાર માનવામાં આવે છે. IPL ૨૦૨૫ ની મેગા ઓક્શન પહેલાં આ બંને ખેલાડીઓને તેમની જૂની ટીમોએ રિટેન કર્યા નહોતા. ત્યારબાદ હરાજીમાં પંજાબ કિંગ્સે શ્રેયસ ઐયરને ૨૬.૭૫ કરોડ રૂપિયામાં ખરીદ્યા હતા, જ્યારે લખનઉ સુપર જાયન્ટ્સે ઋષભ પંત માટે ૨૭ કરોડ રૂપિયાની મોટી રકમ ચૂકવી હતી. આ ઘટનાઓએ સાબિત કર્યું છે કે હરાજીમાં ભારતીય ખેલાડીઓ માટે ટીમો મોટી રકમ ખર્ચવા તૈયાર છે.

અહેવાલો અનુસાર, IPL ૨૦૨૮ પહેલાં મેગા ઓક્શન યોજાવાની શક્યતા છે. આ દરમિયાન ટીમોના કુલ પર્સમાં પણ વધારો થઈ શકે છે. હાલમાં ૧૨૦ કરોડ રૂપિયાનું પર્સ ધરાવતી ટીમોના પર્સને વધારીને ૧૫૦ કરોડ રૂપિયા કરવાની ચર્ચા ચાલી રહી છે. જો પર્સ વધીને ૧૫૦ કરોડ રૂપિયા થાય અને ખેલાડીઓ ૪૦ કરોડ રૂપિયાની રિટેન્શન ફી માટે અડગ રહે, તો ફ્રેન્ચાઇઝીઓ માટે ટીમનું સંતુલન જાળવવું મુશ્કેલ બની શકે છે.

હવે જોવાનું એ રહેશે કે ફ્રેન્ચાઇઝીઓ ખેલાડીઓની આટલી મોટી માંગ સ્વીકારશે કે પછી તેમને હરાજીમાં ઉતારવાનો નિર્ણય લેશે. IPL ૨૦૨૮ પહેલાં રિટેન્શન બાબતે ખેલાડીઓ અને ટીમ મેનેજમેન્ટ વચ્ચે ખેંચતાણ જોવા મળી શકે છે.