દાહોદના દેવગઢ બારીયામાં પિતા કોંગ્રેસમાં જોડપાતા પુત્ર ભાજપમાં હોવાથી રાજકારણ ગરમાયું

સંદેશ અખબારના અહેવાલ મુજબ, દાહોદ જિલ્લાના દેવગઢ બારીયા વિસ્તારમાં એક જ પરિવારના બે સભ્યો અલગ-અલગ વિચારધારા અને પક્ષ સાથે જોડાયેલા હોવાથી રાજકારણ ગરમાયું છે. આશ્ચર્યજનક ઘટનાક્રમમાં ભાજપના પાયાના અને વફાદાર તેમજ મોટો રાજકીય પ્રભાવ ધરાવતા વરિષ્ઠ નેતા કરણ મામાએ કોંગ્રેસનો ખેસ ધારણ કર્યો છે, જ્યારે તેમનો પુત્ર ભારતીય જનતા પાર્ટીમાં પક્ષ પ્રમુખ તરીકે સેવા આપી રહ્યો છે.

આ પક્ષપલટાના કાર્યક્રમમાં કોંગ્રેસ જિલ્લા પ્રમુખ હર્ષદભાઈ નિનામા, ૧૩૪ વિધાનસભા ઇન્ચાર્જ એડવોકેટ સુરેશ પટેલ અને શહેર કોંગ્રેસ પ્રમુખ ઈશ્વરભાઈ વખાલા ખાસ ઉપસ્થિત રહ્યા હતા. પક્ષમાં લાંબા સમયથી યોગ્ય માન-સન્માન ન મળવાની લાગણી અને ઉપેક્ષાનો સામનો કરવો પડવાને કારણે કરણ મામાએ આ મોટું પગલું ભર્યું હોવાનું સામે આવ્યું છે. તેમના આ અચાનક લીધેલા નિર્ણયથી ભાજપ છાવણીમાં આશ્ચર્યની લાગણી ફેલાઈ ગઈ હતી અને વિપક્ષી છાવણીમાં ભારે ઉત્સાહ જોવા મળ્યો હતો.

ઉલ્લેખનીય છે કે કરણ મામા લાંબા સમય સુધી તાલુકા પ્રમુખ તરીકે અને છેલ્લી ૩૦ વર્ષથી ખજૂરી ગામના સરપંચ તરીકે સતત સેવા આપી ચૂક્યા છે. આ રાજકીય ઘટનાક્રમ બાદ દેવગઢ બારીયાના રાજકારણમાં ભારે ચર્ચાઓ શરૂ થઈ ગઈ છે.