મણિપુરમાં વંશીય સંઘર્ષ રોકવા અને SoO કરાર રદ કરવા માટે રેલી યોજાઈ

મણિપુરના ઉખ્રુલ જિલ્લામાં ગુરુવારે હજારો લોકોએ રાજ્યમાં ચાલી રહેલા વંશીય સંઘર્ષનો અંત લાવવા અને વિવિધ માંગણીઓ સાથે એક વિશાળ રેલી કાઢી હતી. 'પીપલ્સ રેલી' તરીકે ઓળખાતી આ પ્રદર્શનમાં મહિલાઓ અને વૃદ્ધો સહિત અનેક લોકો જોડાયા હતા. The Hindu ના અહેવાલ મુજબ, આ રેલી દ્વારા લોકોએ સસ્પેન્શન ઓફ ઓપરેશન્સ (SoO) કરારને રદ કરવાની અને ડેપ્યુટી મુખ્યમંત્રી નેમચા કિપગેનને પદ પરથી હટાવવાની માંગ કરી હતી. નેમચા કિપગેન કુકી સમુદાયના છે.

આ પ્રદર્શન દરમિયાન લોકોએ વિવિધ પ્લેકાર્ડ્સ સાથે સૂત્રોચ્ચાર કર્યા હતા. પ્લેકાર્ડ્સ પર 'SoO કરાર રદ કરો, કુકી સશસ્ત્ર જૂથોને આતંકવાદી જાહેર કરો' અને 'નેમચા કિપગેનને ડેપ્યુટી મુખ્યમંત્રી પદેથી હટાવો' જેવા સંદેશાઓ લખેલા હતા. પ્રદર્શનકારીઓએ કુકી સશસ્ત્ર જૂથો વિરુદ્ધ પણ સૂત્રોચ્ચાર કર્યા હતા. આ ઉપરાંત, મણિપુરમાં ચાલી રહેલા રાજકીય સંકટના નિરાકરણ, નાગા પ્રભુત્વ ધરાવતા વિસ્તારોમાંથી આસામ રાઈફલ્સને હટાવવા અને રાજ્યમાં ચાલી રહેલા પ્રોક્સી યુદ્ધને રોકવા જેવી માંગણીઓ પણ રજૂ કરવામાં આવી હતી.

આ રેલીનું આયોજન યુનાઈટેડ નાગા કાઉન્સિલ (UNC) ના નેજા હેઠળ તાંગખુલ નાગા લોંગ (TNL) અને તાંગખુલ ફ્રન્ટલ સંગઠનો દ્વારા કરવામાં આવ્યું હતું. ઉખ્રુલ ઉપરાંત, તેની નજીકના કામજોંગ જિલ્લામાં પણ આવી જ એક રેલી યોજાઈ હતી.

નોંધનીય છે કે, ચાલુ વર્ષે ફેબ્રુઆરી મહિનામાં કુકી અને નાગા સમુદાયો વચ્ચે વંશીય અથડામણો શરૂ થયા ત્યારથી તમેંગલોંગ, નોનેઈ, કામજોંગ, ઉખ્રુલ અને કાંગપોકપી જિલ્લાઓમાં ૫૦ થી વધુ લોકોના મોત થયા છે અને ડઝનબંધ ઘરો સળગાવી દેવામાં આવ્યા છે. અગાઉ રાજ્યમાં ઈમ્ફાલ વેલીના મેઈતેઈ અને પહાડી વિસ્તારોના કુકીઓ વચ્ચે પણ વંશીય હિંસા થઈ હતી, જેમાં ૩૦૦ થી વધુ લોકોએ જીવ ગુમાવ્યા હતા, ૪૯ લોકો ગુમ થયા હતા અને હજારો લોકો બેઘર બન્યા હતા.

SoO કરાર એ કેન્દ્ર સરકાર, મણિપુર સરકાર અને ડઝનબંધ કુકી અને ઝોમી સશસ્ત્ર જૂથો વચ્ચે થયેલો એક ત્રિપક્ષીય કરાર છે.