કચ્છની સભાઈબેન ગઢવીએ કોમનવેલ્થ કબડ્ડી ચેમ્પિયનશિપમાં ગોલ્ડ મેડલ જીત્યો

કચ્છના માંડવી તાલુકાના મોટા ભાડિયા ગામની સભાઈબેન વાસીયાભાઈ ગઢવીએ આંતરરાષ્ટ્રીય કક્ષાએ કબડ્ડીમાં સિદ્ધિ હાંસલ કરી ગુજરાતનું નામ રોશન કર્યું છે. અમદાવાદ ખાતે યોજાયેલી કોમનવેલ્થ કબડ્ડી ચેમ્પિયનશિપ-૨૦૨૬ માં ભારતીય મહિલા કબડ્ડી ટીમે ફાઇનલમાં યુગાન્ડાને ૩૫-૧૫ થી હરાવી ગોલ્ડ મેડલ જીત્યો હતો. આ વિજયમાં સભાઈબેને ભારતીય ટીમમાં હિસ્સો બની મહત્વનું યોગદાન આપ્યું હતું. સભાઈબેન ગુજરાતના પ્રથમ મહિલા કબડ્ડી ખેલાડી બન્યા છે જેમણે ભારતીય મહિલા ટીમમાં સ્થાન મેળવ્યું છે.

સંદેશના અહેવાલ મુજબ, સભાઈબેનની કબડ્ડીની સફર મોટા ભાડિયા પ્રાથમિક શાળા નં. ૨ ના મેદાનથી શરૂ થઈ હતી. શાળાના આચાર્ય મયુરભાઈ જોશી અને શિક્ષક હરેશભાઈ પંડયાના માર્ગદર્શન હેઠળ તેમણે રમત શરૂ કરી હતી. ત્યારબાદ મોરબીની નવજીવન વિદ્યાલયમાં કોચ વિજયકુમાર ચૌધરી અને નરસિંહ રબારી પાસેથી વિશેષ તાલીમ મેળવી હતી. વર્ષ ૨૦૧૮માં સ્પોર્ટ્સ ઓથોરિટી ઓફ ગુજરાતની ડિસ્ટ્રિક્ટ લેવલ સ્પોર્ટ્સ સ્કૂલ (DLSS) ની પરીક્ષામાં તેમણે સમગ્ર ગુજરાતમાં પ્રથમ સ્થાન મેળવ્યું હતું. ત્યારબાદ સ્પોર્ટ્સ ઓથોરિટી ઓફ ગુજરાત અને સ્પોર્ટ્સ ઓથોરિટી ઓફ ઇન્ડિયા (SAI) ના માર્ગદર્શન હેઠળ તાલીમ મેળવીને તેમણે રાષ્ટ્રીય સ્તરે અનેક મેડલ જીત્યા હતા.

સભાઈબેને ખેલ મહાકુંભ, SGFI અને રાજ્યકક્ષાની સ્પર્ધાઓમાં ગોલ્ડ સહિત અનેક ચંદ્રકો મેળવ્યા છે અને ૨૦મી એશિયન ગેમ્સ માટેના ભારતીય કેમ્પમાં પણ તેમનું સ્થાન નક્કી થયું હતું. કોમનવેલ્થ ચેમ્પિયનશિપ દરમિયાન તેમના ઉત્કૃષ્ટ પ્રદર્શન બદલ તેમને એક મેચમાં બેસ્ટ ડિફેન્ડર જાહેર કરવામાં આવ્યા હતા. ફાઇનલમાં વિજય મેળવ્યા બાદ રવિવારે સભાઈબેન તેમના માતા-પિતા સાથે ગાંધીનગરના સેક્ટર-૫ સ્થિત ખોડિયાર મંદિરે દર્શન કરવા પહોંચ્યા હતા. ત્યાં સાગરદાન ડી. ગઢવી અને ખોડિયાર મંદિર પરિવાર દ્વારા તેમનું અભિવાદન કરી અભિનંદન પાઠવવામાં આવ્યા હતા.