પારડીમાં કામકાજના સ્થળે મહિલાઓની જાતીય સતામણી અંગે જાગૃતિ સેમિનાર યોજાયો

વલસાડ જિલ્લા મહિલા અને બાળ અધિકારીની કચેરી દ્વારા પારડી તાલુકાના જ્યોતિ પ્લાસ્ટિક કંપની ખાતે કર્મચારીઓ માટે એક વિશેષ જાગૃતિ સેમિનારનું આયોજન કરવામાં આવ્યું હતું. આ કાર્યક્રમનો મુખ્ય ઉદ્દેશ્ય કામકાજના સ્થળે મહિલાઓની જાતીય સતામણી અધિનિયમ-૨૦૧૩ વિશે માહિતી આપવાનો હતો.

ડિસ્ટ્રિક્ટ હબ ફોર એમ્પાવરમેન્ટ ઓફ વિમેનના ડિસ્ટ્રિક્ટ મિશન કો-ઓર્ડિનેટર જિજ્ઞેશ પટેલે કર્મચારીઓને વિસ્તૃત માર્ગદર્શન આપ્યું હતું. તેમણે કંપનીમાં આંતરિક સમિતિની રચના, તેની જવાબદારીઓ અને કામગીરી વિશે સમજ આપી હતી. સાથે જ મહિલાઓને કાર્યસ્થળે સુરક્ષિત અને સન્માનજનક વાતાવરણ કેવી રીતે પૂરું પાડવું તે અંગે પણ ચર્ચા કરવામાં આવી હતી. ભારત સરકારના એસએચઈ-બોક્ષ પોર્ટલ વિશે માહિતી આપતા તેમણે જણાવ્યું કે ૧૦ કે તેથી વધુ કર્મચારીઓ ધરાવતી સંસ્થાઓએ આંતરિક સમિતિ બનાવી તેની વિગતો પોર્ટલ પર અપલોડ કરવી જોઈએ.

ડીએચઈડબલ્યુના જેન્ડર સ્પેશિયાલિસ્ટ જિગ્નિશા પટેલે વિવિધ મહિલાલક્ષી યોજનાઓ વિશે માહિતી આપી હતી. વલસાડના 'સખી' વન સ્ટોપ સેન્ટરના કેસ વર્કર પ્રિયાબેને સેન્ટરની કામગીરી અને મહિલાઓને મળતી સહાય વિશે જાણકારી આપી હતી. કાઉન્સેલર નેહાબેન પટેલે પણ કેન્દ્રની કામગીરી અને મહિલાઓને મળતા કાઉન્સેલિંગ અંગે માર્ગદર્શન પૂરું પાડ્યું હતું.