ટાટા પાવર દ્વારા કર્ણાટકમાં ૩૦૦ મેગાવોટનો સોલર પ્રોજેક્ટ કાર્યરત

ટાટા પાવરની પેટાકંપની ટાટા પાવર રિન્યુએબલ એનર્જી લિમિટેડ (TPREL) એ ગુરુવારે કર્ણાટકના કોપ્પલ ખાતે ૩૦૦ મેગાવોટનો સોલર પ્રોજેક્ટ સફળતાપૂર્વક કાર્યરત કર્યો હોવાની જાહેરાત કરી છે. આ પ્રોજેક્ટ સોલર એનર્જી કોર્પોરેશન ઓફ ઈન્ડિયા (SECI) ને રિન્યુએબલ ઊર્જાનો પુરવઠો પૂરો પાડશે.

કંપનીના સત્તાવાર નિવેદન મુજબ, આ પ્રોજેક્ટ વાર્ષિક ધોરણે ૮૧૦ મિલિયન યુનિટ (MUs) રિન્યુએબલ ઊર્જાનું ઉત્પાદન કરશે. આ પ્રોજેક્ટને કારણે દર વર્ષે અંદાજે ૧,૦૩,૮૨૦ ટન કાર્બન ઉત્સર્જન ઘટાડવામાં મદદ મળશે, જે સ્વચ્છ ઊર્જા તરફના ભારતના સંક્રમણને વધુ મજબૂત બનાવશે. આ પ્રોજેક્ટના અમલીકરણમાં મહિલાઓની ભૂમિકા નોંધપાત્ર રહી છે. સાઇટ પર કામ કરતા કુલ કર્મચારીઓમાંથી લગભગ ૪૦ ટકા એટલે કે ૧૬ મહિલા પ્રોફેશનલ્સ હતી, જેમણે સાઇટ મેનેજર અને સાઇટ એન્જિનિયર જેવી મહત્વની જવાબદારીઓ સંભાળી હતી. ટેકનિકલ અમલીકરણ અને એન્જિનિયરિંગ ક્ષેત્રે તેમનું યોગદાન ભારતના રિન્યુએબલ એનર્જી સેક્ટરમાં મહિલાઓની વધતી જતી ભાગીદારી દર્શાવે છે.

આ નવા પ્રોજેક્ટના ઉમેરા સાથે ટાટા પાવર રિન્યુએબલ એનર્જીની કુલ રિન્યુએબલ યુટિલિટી ક્ષમતા ૧૨ ગીગાવોટ (GW) સુધી પહોંચી ગઈ છે. હાલમાં આ ક્ષમતામાંથી ૭.૨ ગીગાવોટ કાર્યરત છે, જેમાં ૫.૮ ગીગાવોટ સોલર અને ૧.૩ ગીગાવોટ વિન્ડ પાવરનો સમાવેશ થાય છે. આ ઉપરાંત, આશરે ૪.૯ ગીગાવોટ ક્ષમતાના પ્રોજેક્ટ્સ હાલમાં અમલીકરણના વિવિધ તબક્કે છે.