ચીનને એનવીડિયા ચિપ નિકાસ મામલે ટ્રમ્પ પ્રશાસનના મંત્રીઓ વચ્ચે ઉગ્ર ઘર્ષણ

આજતક દૈનિકના અહેવાલ મુજબ, ચિપમેકર એનવીડિયાના ચીન સાથેના કનેક્શનને લઈને અમેરિકાના રાષ્ટ્રપતિ ડોનાલ્ડ ટ્રમ્પના મંત્રીઓ વચ્ચે વિવાદ વકર્યો છે અને બંને વચ્ચે ઉગ્ર ચર્ચા થઈ છે. આ સમગ્ર મામલો ત્યારે સામે આવ્યો છે જ્યારે એવા સવાલો ઉભા થઈ રહ્યા છે કે ડોનાલ્ડ ટ્રમ્પને મે મહિનામાં ચીન પ્રવાસ પહેલાં જેન્સેન હુઆંગ સાથે જોડાયેલી ગુપ્તચર બાબતોની ચિંતાઓ વિશે શું જાણકારી હતી. આજતક દ્વારા આપવામાં આવેલી માહિતી અનુસાર, આ વિવાદ હેઠળ અમેરિકી ટ્રેજરી સેક્રેટરી સ્કોટ બેસેન્ટે કોમર્સ સેક્રેટરી હોવર્ડ લુટનિક સાથે આ વાત પર દલીલ અને ચર્ચા કરી છે કે કોમર્સ ડિપાર્ટમેન્ટ એનવીડિયાના ગ્રાહક મેગાસ્પીડને બ્લેકલિસ્ટ કરવામાં નિષ્ફળ રહ્યું છે. એનવીડિયાની ચિપ ચીન સુધી પહોંચવાના આ સમગ્ર કેસમાં મેગાસ્પીડ પર એવો ગંભીર આરોપ મૂકવામાં આવ્યો છે કે તેણે ગેરકાયદેસર રીતે અદ્યતન યુએસ ચિપ્સ ચીનને મોકલી છે. આ બાબત એડમિનિસ્ટ્રેશનની તપાસ અને ચિંતાઓ વચ્ચે સામે આવી છે.

એક્સિઓસની રિપોર્ટને ટાંકીને અહેવાલમાં જણાવવામાં આવ્યું છે કે, યુએસ મિડટર્મ ઇલેક્શન પછી વ્હાઇટ હાઉસ સિચ્યુએશન રૂમની મીટિંગમાં સ્કોટ બેસેન્ટે હોવર્ડ લુટનિકને પ્રશ્ન કર્યો હતો કે મેગાસ્પીડ કંપનીને કોમર્સ ડિપાર્ટમેન્ટની એન્ટિટી લિસ્ટમાં શા માટે સામેલ કરવામાં આવી નથી. આ એન્ટિટી લિસ્ટ રાષ્ટ્રીય સુરક્ષા માટે ખતરો પેદા કરતી કંપનીઓની ઓળખ કરવાનું કામ કરે છે. સૂત્રોના હવાલાથી કહેવામાં આવ્યું છે કે લુટનિકે શરૂઆતમાં જવાબ આપવામાં અસહજતા દર્શાવી હતી અને ત્યારબાદ જણાવ્યું હતું કે તેઓ આ બાબતની તપાસ કરશે. સૂત્રોએ એક્સિઓસને એવું પણ જણાવ્યું છે કે લુટનિકે પાછલા વર્ષે પ્રશાસનના અન્ય અધિકારીઓના મેગાસ્પીડને જવાબદાર ઠેરવવાના પ્રયાસોને નિષ્ફળ બનાવવામાં સમય વિતાવ્યો હતો, જેનું એક કારણ એ ચિંતા પણ હતી કે કંપનીને બ્લેકલિસ્ટ કરવાથી ચીન સાથેનો વેપાર તણાવ વધઈ શકે છે. જો કે, કોમર્સ ડિપાર્ટમેન્ટે એ વાતનું ખંડન કર્યું છે કે સ્કોટ બેસેન્ટ અને હોવર્ડ લુટનિક વચ્ચે કોઈપણ પ્રકારનો ટકરાવ થયો હતો.

આ મામલે ખુદ રાષ્ટ્રપતિ ડોનાલ્ડ ટ્રમ્પે ન્યૂ યોર્ક ટાઇમ્સને જણાવ્યું હતું કે તેમને આ પ્રવાસ પહેલાં આ ચિંતાઓ વિશે જણાવવામાં આવ્યું ન હતું. જો કે, એક યુએસ અધિકારી અને આ મામલા સાથે જોડાયેલા અન્ય લોકોએ અખબારને માહિતી આપી હતી કે સેક્રેટરી ઓફ સ્ટેટ માર્કો રુબિયોએ એર ફોર્સ વન પર ડોનાલ્ડ ટ્રમ્પને આ અંગે માહિતગાર કર્યા હતા, જ્યારે તેમને ખબર પડી કે જેન્સેન હુઆંગ રાષ્ટ્રપતિના પ્રતિનિધિમંડળમાં સામેલ થવાના છે. એવું પણ કહેવાય છે કે ચેતવણી મળવા છતાં ટ્રમ્પે પોતાના પ્લાન પર કામ ચાલુ રાખ્યું હતું. માર્કો રુબિયોએ આ પ્રવાસ પહેલાં વરિષ્ઠ પ્રશાસન અધિકારીઓને મોકલેલા એક ગુપ્ત ઇન્ટેલિજન્સ મેમોની દેખરેખ રાખી હતી. એવું અનુમાન લગાવવામાં આવ્યું હતું કે સિંગાપોરની મેગાસ્પીડ સાથે જોડાયેલી એક ચીની નાગરિક એલિસ હુઆંગને ચીનના મિનિસ્ટ્રી ઓફ સ્ટેટ સિક્યુરિટી દ્વારા ભરતી કરવામાં આવી હતી અને જેન્સેન હુઆંગ સાથે તેના ગાઢ સંબંધો હતા. કોમર્સ અંડરસેક્રેટરી જેફ કેસલરને પણ ડેપ્યુટી લેવલની મીટિંગ દરમિયાન મેગાસ્પીડ વિશે વારંવાર ચેતવણી આપવામાં આવી હતી, પરંતુ તેમણે એવું કહીને નિર્ણય લુટનિક પર છોડી દીધો હતો કે આ નિર્ણય સેક્રેટરીએ જ લેવાનો છે.

આ સમગ્ર વિવાદ વચ્ચે એનવીડિયાના બોર્ડે આ મામલાની નિષ્પક્ષ તપાસ કરવાની જાહેરાત કરી છે, જેની દેખરેખ સ્વતંત્ર ડિરેક્ટર અને બાહ્ય વકીલો દ્વારા કરવામાં આવશે. કંપનીના વડા જેન્સેન હુઆંગે પણ આ તપાસમાં સંપૂર્ણ સહયોગ આપવાનું વચન આપ્યું છે. આમ, એનવીડિયાને લઈને ટ્રમ્પના મંત્રીઓ વચ્ચે ફાટી નીકળેલા આ વિવાદે કોમર્સ ડિપાર્ટમેન્ટ દ્વારા એક્સપોર્ટ-કંટ્રોલના અમલીકરણને લઈને રાષ્ટ્રીય સુરક્ષા અધિકારીઓમાં રહેલી વધતી નિરાશાને પણ જગજાહેર કરી દીધી છે.