સમૃદ્ધિ એક્સપ્રેસવે પર ૧૮ વાહનો વચ્ચે ભીડંતમાં સાત લોકો ઘાયલ

મુંબઈ-નાગપુર સમૃદ્ધિ એક્સપ્રેસવે પર શુક્રવારે સવારે એક ટ્રક કાર સાથે અથડાતા ૧૮ વાહનો વચ્ચે ભીડંત સર્જાઈ હતી, જેમાં ઓછામાં ઓછા સાત લોકો ઘાયલ થયા હોવાનું પોલીસ દ્વારા જણાવવામાં આવ્યું છે. હિન્દુસ્તાન ટાઈમ્સના અહેવાલ મુજબ, આ અકસ્માત બુલ્ધાણા જિલ્લામાં મુંબઈ તરફ જતી લેનમાં દુસરભી ટોલ પોઈન્ટ પાસે સવારે અંદાજે ૧૧ વાગ્યે થયો હતો. આ ઘટના 'ચેનજ ૩૨૧' (નાગપુરથી ૩૨૧ કિમી દૂર) પાસે બની હતી.

એક સિમેન્ટ મિક્સર ટ્રોલી પલટી જવાથી મુંબઈ તરફ જતો માર્ગ અવરોધાયેલો હતો, જેના કારણે અનેક વાહનોએ રોકાવું પડ્યું હતું. એનસીપી (એસપી) નેતા અને મહારાષ્ટ્રના પૂર્વ મંત્રી રાજેશ ટોપે સોશિયલ મીડિયા પર જણાવ્યું હતું કે તેઓ નાગપુરથી જલના જઈ રહ્યા હતા અને તેમની કાર બાજુની લેનમાં ઉભી હતી. તેમણે ઉમેર્યું કે અચાનક સ્ટીલ ભરેલી એક ટ્રક પાછળથી ઝડપથી આવી હતી અને ડ્રાઈવરે નિયંત્રણ ગુમાવતા લાઈનમાં ઉભેલા વાહનો સાથે અથડાઈ હતી.

રાજેશ ટોપે ઘાયલોની સંખ્યા ૩૫ હોવાનું જણાવ્યું હતું, પરંતુ સિનિયર પોલીસ અધિકારીએ સ્પષ્ટતા કરી હતી કે માત્ર ચાર લોકોને ગંભીર ઈજાઓ થઈ છે અને અન્ય ત્રણ લોકોને સામાન્ય ઈજાઓ થઈ છે. ટ્રક કાર સાથે પાછળથી અથડાઈ હતી, જેના કારણે અન્ય વાહનો વચ્ચે પણ અથડામણ થઈ હતી. ટોપે ઈજાગ્રસ્તોને બચાવવામાં અને તેમને હોસ્પિટલ પહોંચાડવામાં મદદ કરી હતી. તેમણે એક્સપ્રેસવે પર વધતા અકસ્માતો અંગે ચિંતા વ્યક્ત કરી હતી અને સરકારને તાત્કાલિક નિવારક પગલાં લેવા જણાવ્યું હતું.

રાજેશ ટોપે મહારાષ્ટ્ર સરકારમાં પૂર્વ મંત્રી તરીકે સેવા આપી ચૂક્યા છે અને તેઓ એનસીપી (એસપી) પક્ષના નેતા છે.