બીઆઈટીએસ પિલાની ૨૦૨૭થી ટોપ ૧૦૦૦ બીટ્સએટ રેન્કર્સને ૧૦૦ ટકા ટ્યુશન ફી માફી આપશે

બીઆઈટીએસ પિલાની સંસ્થા દ્વારા વર્ષ ૨૦૨૭ના એડમિશન સાયકલથી બીટ્સએટ (BITSAT) પ્રવેશ પરીક્ષામાં ટોપ ૧,૦૦૦ રેન્ક મેળવનાર વિદ્યાર્થીઓ માટે ૧૦૦ ટકા ટ્યુશન ફી સ્કોલરશિપની જાહેરાત કરવામાં આવી છે. આ નવી યોજના હેઠળ, શૈક્ષણિક અને આવકના નિર્ધારિત માપદંડો પૂર્ણ કરતા વિદ્યાર્થીઓને તેમના ચાર વર્ષના અંડરગ્રેજ્યુએટ પ્રોગ્રામ દરમિયાન સંપૂર્ણ ટ્યુશન ફીમાંથી મુક્તિ આપવામાં આવશે. આ નિર્ણયથી શૈક્ષણિક રીતે પ્રતિભાશાળી વિદ્યાર્થીઓને આર્થિક સહાયનો વ્યાપ વધશે, ખાસ કરીને એવા વિદ્યાર્થીઓ માટે જેમની કુટુંબની વાર્ષિક આવક ₹ ૨૦ લાખ સુધી છે.

મીન્ટના અહેવાલ મુજબ, આ સ્કોલરશિપ માટેના નિયમો ખૂબ જ સ્પષ્ટ કરવામાં આવ્યા છે. જે વિદ્યાર્થીઓ આ યોજનાનો લાભ લેવા માંગતા હોય, તેમણે તેમના ચાર વર્ષના અભ્યાસ દરમિયાન ઓછામાં ઓછો ૭.૫ ક્યુમ્યુલેટીવ ગ્રેડ પોઈન્ટ એવરેજ (CGPA) જાળવી રાખવો પડશે. આ સ્કોલરશિપની સૌથી મોટી વિશેષતા એ છે કે તે એડમિશન ઓફર સાથે જ સામેલ કરવામાં આવશે, જેના કારણે વિદ્યાર્થીઓએ પ્રવેશ મેળવ્યા પછી અલગથી કોઈ અરજી કરવાની જરૂર રહેશે નહીં.

બીઆઈટીએસ પિલાની ગ્રુપના વાઈસ ચાન્સેલર વી. રામગોપાલ રાવે સમાચાર એજન્સી પીટીઆઈ (PTI) ને આપેલા એક ઈન્ટરવ્યુમાં આ પહેલની પુષ્ટિ કરી હતી. તેમણે જણાવ્યું હતું કે, આ પ્રયાસનો મુખ્ય ઉદ્દેશ્ય એ સુનિશ્ચિત કરવાનો છે કે આર્થિક મર્યાદાઓને કારણે ઉચ્ચ પ્રદર્શન કરતા વિદ્યાર્થીઓ આ સંસ્થા પસંદ કરવામાં અસમર્થ ન રહે.