મહેસાણાના ઉનાવા પાસે ગણેશ એગ્રોના ગોડાઉનમાં દરોડા, ૨,૫૦૦ યુરિયાની થેલીઓ ઝડપાઈ

મહેસાણા જિલ્લાના ઉનાવા વિસ્તારમાં આવેલ ગણેશ એગ્રોના ગોડાઉનમાં અનધિકૃત રીતે રાખવામાં આવેલા ખાતરનો મોટો જથ્થો મળી આવ્યો છે. જિલ્લા વહીવટી તંત્ર અને મામલતદાર સહિતની ટીમે આ ગોડાઉનમાં દરોડા પાડતા અંદાજે ૨,૫૦૦ જેટલી યુરિયા ખાતરની થેલીઓનો મોટો જથ્થો ઝડપી લેવામાં આવ્યો છે. આ અનધિકૃત જથ્થાના પર્દાફાશ બાદ તંત્ર દ્વારા તપાસનો ધમધમાટ શરૂ કરવામાં આવ્યો છે.

દરોડા દરમિયાન ગોડાઉનમાં યુરિયા ખાતરની થેલીઓ ઉપરાંત વિવિધ પ્રખ્યાત કંપનીઓના નામ ધરાવતી ખાલી બેગો પણ મળી આવી હતી. આમાં જીએનએફસી, ક્રિભકો, ઇફકો અને ઇન્ડિયન પોટાશ લિમિટેડ જેવી જાણીતી કંપનીઓના નામ લખેલી થેલીઓનો સમાવેશ થાય છે. આ ઉપરાંત, ખાતરના પેકિંગ માટે વપરાતું મશીન અને અન્ય સામગ્રી પણ મળી આવતા તંત્ર દ્વારા તપાસનો વ્યાપ વધારવામાં આવ્યો છે.

પ્રાથમિક તપાસમાં એવી આશંકા સેવાઈ રહી છે કે આ યુરિયા ખાતરનો ઉપયોગ ખાનગી કંપનીઓ દ્વારા કરવામાં આવતો હતો. તંત્ર હવે એ બાબતની તપાસ કરી રહ્યું છે કે આ ખાતર ક્યાંથી લાવવામાં આવતું હતું, તેનું પેકિંગ ક્યાં કરવામાં આવતું હતું અને તેનો ઉપયોગ કયા હેતુ માટે કરવામાં આવતો હતો. આ તમામ મુદ્દે હાલમાં તપાસ ચાલી રહી છે અને તંત્ર દ્વારા વિગતો એકત્રિત કરવામાં આવી રહી છે.

વહીવટી તંત્ર દ્વારા ઝડપાયેલા તમામ જથ્થાને સીઝ કરવાની કાર્યવાહી હાથ ધરવામાં આવી છે. ગોડાઉનમાંથી ઝડપાયેલા ખાતરના નમૂના લેવાની કામગીરી પણ હાથ ધરવામાં આવી છે. મામલતદાર સહિતના જિલ્લા વહીવટી તંત્રના અધિકારીઓ આ સમગ્ર મામલે તપાસ કરી રહ્યા છે અને ખાતરના જથ્થા તથા પેકિંગ સામગ્રી અંગેની વિગતો એકત્ર કરી રહ્યા છે. આ સમગ્ર તપાસ પૂર્ણ થયા બાદ જ આ નેટવર્ક અંગેની વધુ હકીકતો સામે આવશે અને આ બાબતે વધુ તપાસ હાથ ધરવામાં આવી છે.