બોરીવલીમાં બીએમસીની તોડફોડ સામે પૂર્વ સાંસદ ગોપાલ શેટ્ટીએ મુંડન કરાવી વિરોધ નોંધાવ્યો

મુંબઈના બોરીવલી પૂર્વ વિસ્તારમાં બૃહન્મુંબઈ મ્યુનિસિપલ કોર્પોરેશન (બીએમસી) દ્વારા હાથ ધરવામાં આવેલી તોડફોડની કાર્યવાહી સામે ભાજપના પૂર્વ સાંસદ ગોપાલ શેટ્ટીએ આકરો વિરોધ નોંધાવ્યો છે. તેમણે આ કાર્યવાહીના વિરોધમાં પોતાનું મુંડન કરાવીને પોતાનો રોષ વ્યક્ત કર્યો છે. હિન્દુસ્તાન ટાઈમ્સના અહેવાલ મુજબ, બીએમસીએ ૪ નવેમ્બરના રોજ વહેલી સવારે બોરીવલી પૂર્વમાં સ્વામી વિવેકાનંદ રોડ પર આવેલી ૩,૪૦૦ ચોરસ મીટરની જમીન પર બનેલા ૨૭ મકાનો તોડી પાડ્યા હતા. આ જમીન બેસ્ટ બસ સ્ટેશન માટે અનામત રાખવામાં આવી હતી.

ગોપાલ શેટ્ટીએ આ કાર્યવાહીને 'લોકશાહીની મજાક' ગણાવી છે. તેમણે આક્ષેપ કર્યો હતો કે રહેવાસીઓને માત્ર ૧.૩૦ વાગ્યે નોટિસ આપવામાં આવી હતી અને સવારના ૭ વાગ્યા સુધીમાં તો તેમના ઘરો તોડી પાડવામાં આવ્યા હતા. આ દરમિયાન લોકોને તેમનો ઘરવખરીનો સામાન બહાર કાઢવા માટે પણ પૂરતો સમય આપવામાં આવ્યો ન હતો. શેટ્ટીએ કહ્યું કે, મારા જાહેર જીવનમાં મેં આવી કાર્યવાહી ક્યારેય જોઈ નથી. તેમણે ૨૬/૧૧ના આતંકવાદી અજમલ કસાબનો ઉલ્લેખ કરતા કહ્યું કે, તેને પણ ટ્રાયલ માટે ૮ વર્ષ આપવામાં આવ્યા હતા અને દોષિત ઠર્યા બાદ રાષ્ટ્રપતિ પાસે જવાની તક મળી હતી, પરંતુ અહીં ગરીબ પરિવારો સાથે આવું વર્તન કરવામાં આવ્યું છે.

પૂર્વ સાંસદે દાવો કર્યો હતો કે આ મકાનો જે જમીન પર હતા તે ખાનગી જમીન હતી અને લોકો ત્યાં લગભગ ૫૦ વર્ષથી રહેતા હતા. તેમની પાસે પ્રોપર્ટી એસેસમેન્ટ બિલ પણ ઉપલબ્ધ છે. તેમણે બીએમસી પર સુપ્રીમ કોર્ટમાં ખોટી માહિતી રજૂ કરવાનો આરોપ લગાવ્યો છે. સુપ્રીમ કોર્ટે અગાઉ બીએમસીને દબાણ હટાવવા માટે નિર્દેશ આપ્યો હતો અને આદેશનું પાલન ન થતા મ્યુનિસિપલ કમિશનર અશ્વિની ભીડે અને સંબંધિત અધિકારીઓના નવેમ્બર મહિનાના પગાર પર રોક લગાવી હતી. જોકે, બાદમાં બીએમસીએ દબાણ હટાવી દીધાની જાણ કરતા કોર્ટે આ આદેશ પાછો ખેંચી લીધો હતો. શેટ્ટીએ માંગ કરી છે કે ન્યાયતંત્રએ આ સમગ્ર મામલે જવાબદાર અધિકારીઓની ભૂમિકાની તપાસ કરવી જોઈએ.

આ વિવાદ વચ્ચે બીએમસીએ આર-સેન્ટ્રલ વોર્ડના આસિસ્ટન્ટ મ્યુનિસિપલ કમિશનર પ્રફુલ તાંબે અને લો ઓફિસર કોમલ પંજાબીને વહીવટી ક્ષતિઓ બદલ કારણદર્શક નોટિસ ફટકારી છે અને કાયદા વિભાગનો હવાલો પણ બદલી નાખ્યો છે. બીજી તરફ, ગોપાલ શેટ્ટીએ પોતાની જ પાર્ટીના સ્થાનિક નેતૃત્વ સામે નારાજગી વ્યક્ત કરી છે. તેમણે કહ્યું કે ઉત્તર મુંબઈના ભાજપના નેતાઓએ અસરગ્રસ્ત પરિવારોની મુલાકાત લીધી નથી કે તેમને ટેકો આપ્યો નથી. તેમણે સ્પષ્ટ કર્યું કે તેઓ પાર્ટીના કાર્યક્રમોથી દૂર રહેશે અને આ મુદ્દો દિલ્હીમાં પાર્ટીના ઉચ્ચ નેતૃત્વ સમક્ષ ઉઠાવશે.