એચડીએફસી કેપિટલ અને દિવ્યાશ્રી દ્વારા ₹૧,૫૦૦ કરોડનું રેસિડેન્શિયલ પ્લેટફોર્મ સ્થાપાયું

બિઝનેસ સ્ટાન્ડર્ડના અહેવાલ મુજબ, એચડીએફસી કેપિટલે રિયલ્ટી ફર્મ દિવ્યાશ્રી ડેવલપર્સ સાથે મળીને ₹૧,૫૦૦ કરોડનું ફંડ ઊભું કર્યું છે. સોમવારે જાહેર કરાયેલા નિવેદનમાં બેંગલુરુ સ્થિત દિવ્યાશ્રી ડેવલપર્સે જણાવ્યું હતું કે તેમણે ભારતમાં આ રેસિડેન્શિયલ પ્લેટફોર્મ સ્થાપવા માટે એચડીએફસી કેપિટલ એડવાઈઝર્સ લિમિટેડ સાથે ભાગીદારી કરી છે.

આ ભાગીદારી દિવ્યાશ્રીને આગામી ૩ થી ૪ વર્ષમાં ₹૬,૭૫૦ કરોડની સંભવિત આવક ધરાવતા રેસિડેન્શિયલ પ્રોજેક્ટ્સની ખરીદી અને વિકાસને ટેકો આપવા માટે ગ્રોથ કેપિટલ પૂરું પાડશે. આ તમામ પ્રોજેક્ટ્સ બેંગલુરુ, હૈદરાબાદ અને ચેન્નઈ શહેરોમાં વિકસાવવામાં આવશે.

આ અંગે એચડીએફસી કેપિટલના મેનેજિંગ ડિરેક્ટર અને સીઈઓ વિપુલ રૂંગટાએ જણાવ્યું હતું કે, શહેરી બજારોમાં ઉચ્ચ ગુણવત્તાવાળા આવાસની સતત માંગને કારણે ભારતનું રેસિડેન્શિયલ રિયલ એસ્ટેટ ક્ષેત્ર સંસ્થાગત સમર્થિત વિકાસ માટે મજબૂત તકો પૂરી પાડવાનું ચાલુ રાખે છે. તેમણે ઉમેર્યું હતું કે દિવ્યાશ્રી ડેવલપર્સ રિયલ એસ્ટેટ વિકાસમાં મજબૂત ટ્રેક રેકોર્ડ, ઊંડી બજાર સમજ અને ગુણવત્તાયુક્ત અમલીકરણ માટેની પ્રતિબદ્ધતા ધરાવે છે.

વિપુલ રૂંગટાએ વધુમાં જણાવ્યું હતું કે આ ભાગીદારી દ્વારા મુખ્ય ઉદ્દેશ્ય રેસિડેન્શિયલ પ્રોજેક્ટ્સની સ્કેલેબલ પાઇપલાઇનના નિર્માણને ટેકો આપવાનો છે. દિવ્યાશ્રી ડેવલપર્સના ચેરમેન અને સીઈઓ ભાસ્કર એન રાજુએ જણાવ્યું હતું કે આ પ્લેટફોર્મ કંપનીને તેના રેસિડેન્શિયલ બિઝનેસના વિસ્તરણના વિઝનને સાકાર કરવામાં મદદ કરશે.

ભાસ્કર એન રાજુએ ઉમેર્યું હતું કે એચડીએફસી કેપિટલ સાથેની આ ભાગીદારી દિવ્યાશ્રી માટે આગામી વર્ષોમાં આયોજન કરેલા વિકાસમાં મહત્ત્વકાંક્ષા અને વિશ્વાસ દર્શાવે છે. દિવ્યાશ્રી ડેવલપર્સ દક્ષિણ ભારતની અગ્રણી રિયલ એસ્ટેટ ફર્મ પૈકીની એક છે.

ઈસ ૧૯૭૫માં સ્થપાયેલી દિવ્યાશ્રી કોમર્શિયલ, રેસિડેન્શિયલ, એસેટ મેનેજમેન્ટ, હોસ્પિટાલિટી, કો-લિવિંગ અને એજ્યુકેશન ક્ષેત્રોમાં વૈવિધ્યસભર પોર્ટફોલિયો ધરાવે છે. આ ગ્રૂપ દ્વારા અત્યાર સુધીમાં આશરે ૩ કરોડ ચોરસ ફૂટ રિયલ એસ્ટેટનું નિર્માણ કરવામાં આવ્યું છે.

એચડીએફસી બેંક લિમિટેડની પેટાકંપની એવી એચડીએફસી કેપિટલ એચડીએફસી ગ્રૂપનું રિયલ એસ્ટેટ પ્રાઇવેટ ઇક્વિટી આર્મ છે. એચડીએફસી કેપિટલનું મુખ્ય ધ્યાન સસ્તી અને મધ્યમ આવક ધરાવતા મકાનોના વિકાસ માટે નાણાકીય સહાય પૂરી પાડવા પર છે.