વિંસ્ટન-સેલેમ સ્ટેટ યુનિવર્સિટીમાં ગોળીબારમાં એકનું મોત, ૨૦ વર્ષીય યુવક ઝડપાયો

ઉત્તર કેરોલિનામાં આવેલી ઐતિહાસિક રીતે બ્લેક યુનિવર્સિટી, વિંસ્ટન-સેલેમ સ્ટેટ યુનિવર્સિટીમાં થયેલા જીવલેણ ગોળીબારના કેસમાં ૨૦ વર્ષીય યુવકની ધરપકડ કરવામાં આવી છે. આ ઘટનામાં એક વ્યક્તિનું મોત થયું છે જ્યારે અન્ય એક વ્યક્તિ ઘાયલ થઈ છે. ધરપકડ કરાયેલા ૨૦ વર્ષીય ઝિયેયર સ્પિંક્સ પર હત્યા અને શૈક્ષણિક સંસ્થાના પરિસરમાં ફાયરઆર્મ્સ રાખવાના આરોપો મૂકવામાં આવ્યા છે અને તેને જામીન વગર કસ્ટડીમાં રાખવામાં આવ્યો છે.

ધ ઇન્ડિપેન્ડન્ટના અહેવાલ મુજબ, આ ઘટના હોમકમિંગ વીકેન્ડ દરમિયાન બની હતી. વિંસ્ટન-સેલેમ પોલીસ વિભાગના આસિસ્ટન્ટ ચીફ જેસન સ્વેમ જણાવ્યું હતું કે શનિવારે રાત્રે આશરે ૯.૪૫ વાગ્યે ગોળીબારની જાણ મળતા પોલીસ અધિકારીઓ કેમ્પસ પર પહોંચ્યા હતા. ત્યાં તેમને ૧૯ વર્ષીય યુવક મળી આવ્યો હતો જેને ગોળી વાગી હતી, પરંતુ તેને બચાવવાના પ્રયત્નો નિષ્ફળ રહ્યા હતા. આ ઉપરાંત, ઘટનાસ્થળે ૨૨ વર્ષીય એક મહિલા પણ મળી આવી હતી જેને ગોળી વાગી હોય તેમ જણાયું હતું. તેને હોસ્પિટલ લઈ જવામાં આવી હતી, જ્યાં સારવાર બાદ તેને રજા આપવામાં આવી હતી.

પોલીસના જણાવ્યા અનુસાર, આ એક અલગ ઘટના હતી અને ગોળીબાર સંબંધી સંજોગોની તપાસ હજુ ચાલુ છે. પોલીસ દ્વારા વહેલી સવારે યોજાયેલી ન્યૂઝ કોન્ફરન્સમાં એવી માહિતી આપવામાં આવી હતી કે શનિવારે રાત્રે કેમ્પસમાં બે અલગ-અલગ ગોળીબારની ઘટનાઓ બની હતી, જોકે બીજી ઘટના વિશે કોઈ વિગતો આપવામાં આવી નથી.

આ દુર્ઘટના બાદ યુનિવર્સિટીના અધિકારીઓએ હોમકમિંગના બાકીના તમામ કાર્યક્રમો રદ કર્યા હતા. તેના બદલે, સમુદાયના સમર્થનમાં પ્રાર્થના માટે એક સ્થાનિક ચર્ચ દ્વારા આયોજન કરવામાં આવ્યું હતું. ચાન્સેલર બોનિટા જે. બ્રાઉને રવિવારે સવારે એક નિવેદન જાહેર કરીને આ ઘટનાને "અર્થહીન હિંસા" ગણાવી હતી.

બ્રાઉને વિદ્યાર્થીઓ, ફેકલ્ટી અને વાલીઓને ખાતરી આપી હતી કે કેમ્પસ સુરક્ષિત છે અને તપાસ ચાલુ રહે ત્યાં સુધી વધારાની પોલીસ તૈનાત રહેશે. તેમણે વધુમાં જણાવ્યું હતું કે, "અમે એ ચિંતા અને બેચેનીને સમજીએ છીએ જે આ ઘટનાઓએ અમારા વિદ્યાર્થીઓ, વાલીઓ, પરિવારો અને વ્યાપક સમુદાયમાં પેદા કરી છે. અમે કેમ્પસની સુરક્ષાની અમારી જવાબદારીને ગંભીરતાથી લઈએ છીએ અને યુનિવર્સિટી સમુદાયના દરેક વ્યક્તિના કલ્યાણ માટે પ્રતિબદ્ધ છીએ." યુનિવર્સિટી દ્વારા જરૂરિયાત મુજબ કાઉન્સેલિંગની સુવિધા પણ આપવામાં આવી રહી છે.