આંબરડી ગામે ખેડૂતોની જેલમુક્તિ બાદ બે વર્ષે ઉજવાઈ દીપોત્સવી

સુરેન્દ્રનગર જિલ્લાના મૂળી તાલુકાના આંબરડી ગામમાં આ વર્ષે દિવાળીનો તહેવાર સાચા અર્થમાં ખુશીઓ લઈને આવ્યો છે. અગાઉના વર્ષે કળદાકાંડ તેમજ અન્ય વિવાદોના કારણે ગામના ખેડૂતો જેલવાસ ભોગવી રહ્યા હતા, જેના લીધે આખો વિસ્તાર શોકમાં ડૂબેલો હતો અને દિવાળી ઉજવાઈ શકી ન હતી. વર્તમાન વર્ષમાં ખેડૂતો જેલમાંથી મુક્ત થતાં સમગ્ર ગામમાં પુનઃ રોશની અને ઉત્સાહનો માહોલ જોવા મળ્યો છે.

ગયા વર્ષે જેલમાં હોવાથી દીપોત્સવી નહીં મનાવી શકનાર ખેડૂત આગેવાન રાજુ કરપડા આ વખતે સીધા જ દિવાળીના પવિત્ર દિવસે આંબરડી ગામે ખેડૂત પરિવારોને મળવા માટે આવ્યા હતા. તેમની સાથે આસપાસના ગ્રામ્ય વિસ્તારોમાંથી પણ મોટી સંખ્યામાં ખેડૂત આગેવાનો હાજર રહ્યા હતા. રાજુભાઈએ ગામમાં આવીને બાળકોને મીઠાઈ ખવડાવી હતી, તેમની સાથે મુલાકાત કરીને ખુશીઓ વહેંચી હતી અને વડીલોના આશીર્વાદ પ્રાપ્ત કર્યા હતા.

આ મુલાકાત વેળાએ તમામ આગેવાનોએ વિહળ બાપુ રાબા સહિત ૧૨ ભયબંધના પવિત્ર સ્થળે પહોંચીને દર્શન કર્યા હતા અને પોતાની માનતા પૂરી કરી હતી. આ ઉપરાંત ગામના આગેવાનો તથા ખેડૂતોની ઉપસ્થિતિમાં એક બેઠકનું આયોજન કરવામાં આવ્યું હતું, જેમાં સિંચાઈ માટેનું પાણી, જળાશયોની હાલની સ્થિતિ અને ગામના અન્ય સ્થાનિક પ્રશ્નો ઉપર ગંભીર ચર્ચા વિચારણા કરવામાં આવી હતી. આ પ્રકારે બે વર્ષના લાંબા સંઘર્ષ પછી ખેડૂતો પોતાના પરિવારજનોની સાથે આનંદપૂર્વક દિવાળી પર્વ ઉજવી શકતા સમગ્ર પંથકમાં ખુશીની લહેર છવાઈ ગઈ છે.