ગોમાંસ વેચાણ કેસમાં અમદાવાદ કોર્ટે શખ્સને ૮ વર્ષની કેદ ફટકારી

અમદાવાદની સેશન્સ કોર્ટે ગોમાંસ રાખવા અને વેચવાના કેસમાં કયુમ કુરેશી નામના શખ્સને ૮ વર્ષની સખત કેદની સજા ફટકારી છે. આ સાથે કોર્ટે તેને ૨ લાખ રૂપિયાનો દંડ પણ ભરવાનો આદેશ કર્યો છે. આ કેસમાં પૂરતા પુરાવાના અભાવે સપ્લાયર તરીકે સંડોવાયેલા સહઆરોપી આસિફ શેખ ઉર્ફે બાદશાહને કોર્ટે નિર્દોષ જાહેર કર્યો છે.

દેશ ગુજરાતના અહેવાલ મુજબ, આ ઘટના ૫મી મે ૨૦૨૦ની છે. ઇસનપુર પોલીસે ચાંદોલા તળાવ પાસે આવેલા ફૈઝલ પાર્ક ખાતે એક દુકાનમાં દરોડો પાડ્યો હતો અને કયુમ કુરેશી વગર પરવાનગી કે કાયદેસરની મંજૂરી વગર ગોમાંસ વેચી રહ્યો હોવાનું પકડાયું હતું. પોલીસે સ્થળ પરથી ૧૦,૪૦૦ રૂપિયાની કિંમતનું ૬૫ કિલોગ્રામ માંસ જપ્ત કર્યું હતું, તેમજ ચાકુ, કાપવાના સાધનો, વજન કાંટા અને અન્ય સામગ્રી પણ કબજે લીધી હતી. ફોરેન્સિક તપાસમાં આ માંસ ગૌવંશનું હોવાની પુષ્ટિ થઈ હતી. બાદશાહ પર કુરેશીને માંસ સપ્લાય કરવાનો આરોપ હતો.

બ બંને આરોપીઓ સામે ગૌહત્યા અને ગોમાંસ રાખવા બાબતે ગુજરાત એનિમલ પ્રિઝર્વેશન એક્ટ, ૨૦૧૭ હેઠળ ગુનો નોંધવામાં આવ્યો હતો. કોર્ટે કયુમ કુરેશીને ગૌહત્યાના આરોપમાંથી મુક્ત કર્યો હતો, પરંતુ ફોરેન્સિક અહેવાલ અને અન્ય પુરાવાઓના આધારે તેને ગોમાંસ રાખવા અને વેચવાના ગુનામાં દોષિત ઠેરવ્યો હતો. સેશન્સ જજ એસ.આર. સંગાણીએ કુરેશીની પ્રોબેશનની અરજી ફગાવી દીધી હતી. કોર્ટે આ ગુનાને સમાજ વિરોધી સ્વરૂપનો ગણાવ્યો હતો અને અવલોકન કર્યું હતું કે આ કૃત્ય નાણાકીય લાભ મેળવવા માટે જાણી જોઈને આચરવામાં આવ્યું હતું.