વિનફાસ્ટની ૭-સીટર ઇલેક્ટ્રિક કાર VF MPV 7 ની કિંમતમાં ૪.૧ લાખનો ઘટાડો

વિયેતનામની દિગ્ગજ ઇલેક્ટ્રિક વ્હીકલ કંપની વિનફાસ્ટે ભારતીય બજારમાં પોતાની ૭-સીટર ઇલેક્ટ્રિક કાર VF MPV 7 ની કિંમતોમાં ૪.૧ લાખ રૂપિયાનો મોટો ઘટાડો કર્યો છે. આ નિર્ણય કંપનીએ દિવાળીના તહેવારો પહેલા લીધો છે. આ કારની કિંમતોમાં કરવામાં આવેલો આ ઘટાડો તેના લોન્ચિંગના માત્ર ૬ મહિના બાદ જ કરવામાં આવ્યો છે.

આજ તકના અહેવાલ મુજબ, વિનફાસ્ટે અગાઉ VF MPV 7 ને ૨૪.૪૯ લાખ રૂપિયાની શરૂઆતી એક્સ-શોરૂમ કિંમત સાથે લોન્ચ કરી હતી. કિંમતમાં ઘટાડો કર્યા બાદ હવે આ કારની શરૂઆતી એક્સ-શોરૂમ કિંમત ૨૦.૩૯ લાખ રૂપિયા થઈ ગઈ છે. અગાઉ આ કાર તેના સેગમેન્ટની સૌથી મોંઘી કારોમાં સામેલ હતી, પરંતુ હવે કિંમતો ઘટતા તે એક પરવડે તેવી પસંદગી બની ગઈ છે.

બજારમાં અન્ય સ્પર્ધકો સાથે સરખામણી કરીએ તો, કિયા કારન્સ ક્લેવિસ ઇવીની શરૂઆતી એક્સ-શોરૂમ કિંમત ૧૮.૦૪ લાખ રૂપિયા છે. જ્યારે એમજી હેક્ટર ટોમાહોક ઇવી ૨૦.૨૫ લાખ રૂપિયા અને મહિન્દ્રા XEV 9S ૨૦.૬૫ લાખ રૂપિયાની શરૂઆતી એક્સ-શોરૂમ કિંમત સાથે બજારમાં ઉપલબ્ધ છે.

ટેકનિકલ વિગતોની વાત કરીએ તો, વિનફાસ્ટ VF MPV 7 માં ૬૦.૧૩ kWh ની બેટરી આપવામાં આવી છે. આ કારમાં ફ્રન્ટ માઉન્ટેડ ઇલેક્ટ્રિક મોટર છે, જે ૨૦૪ HP પાવર અને ૨૮૦ Nm ટોર્ક જનરેટ કરે છે. આ કાર માત્ર ૯ સેકન્ડમાં ૦ થી ૧૦૦ કિલોમીટર પ્રતિ કલાકની ઝડપ પકડી શકે છે. તેની ટોપ સ્પીડ ૧૪૦ કિલોમીટર પ્રતિ કલાક છે અને તેની ક્લેમ્ડ રેન્જ ૫૧૭ કિલોમીટર છે. ચાર્જિંગ માટે આ કાર ૬.૯ kW ની એસી ચાર્જિંગ અને ૮૦ kW ની ડીસી ચાર્જિંગ સુવિધાને સપોર્ટ કરે છે.

વિનફાસ્ટ ભારતીય બજારમાં ઝડપથી પ્રગતિ કરી રહી છે. કંપનીએ ઇલેક્ટ્રિક વ્હીકલ સેગમેન્ટમાં પ્રવેશતાની સાથે જ ટોપ ૫ કંપનીઓની યાદીમાં સ્થાન મેળવ્યું છે. ઓટો પંડિત્ઝના રિપોર્ટ મુજબ, કંપનીએ ઓક્ટોબર મહિનામાં ભારતમાં ૨,૫૭૧ ગાડીઓ વેચી છે, જે વર્ષોનુવર્ષના ધોરણે ૧,૭૧૦ ટકાનો ગ્રોથ દર્શાવે છે. આ સાથે જ વિનફાસ્ટ ભારતમાં ચોથી સૌથી વધુ ઇલેક્ટ્રિક કાર વેચતી કંપની બની ગઈ છે.

વિનફાસ્ટે ભારતીય બજારમાં તેની સફર વર્ષ ૨૦૨૫માં શરૂ કરી હતી. કંપની હાલમાં ભારતીય ગ્રાહકો માટે ખાસ કાર બનાવવાની દિશામાં પણ કામ કરી રહી છે, જેની કિંમત ૧૦ લાખ રૂપિયાથી ઓછી હોઈ શકે છે અને કંપનીએ નવી SUV માટે પેટન્ટ પણ ફાઇલ કરી છે.

વિનફાસ્ટ એ વિયેતનામની એક મોટી ઇલેક્ટ્રિક વ્હીકલ ઉત્પાદક કંપની છે. તેણે ભારતીય બજારમાં પ્રવેશ કરીને ઇલેક્ટ્રિક કારના ક્ષેત્રમાં ઝડપથી પોતાનું સ્થાન બનાવ્યું હતું.