યુપીમાં ડ્રગ્સ બનાવતી મોટી લેબોરેટરી ઝડપી ૧,૧૦૦ કિલો નશીલા પદાર્થો જપ્ત

ડાયરેક્ટોરેટ ઓફ રેવન્યુ ઈન્ટેલિજન્સ (DRI) દ્વારા દેશમાં ગેરકાયદેસર સિન્થેટિક ડ્રગ્સના ઉત્પાદન સામે મોટી કાર્યવાહી કરવામાં આવી છે. ઉત્તર પ્રદેશના જલાઉન જિલ્લાના એક અંતરિયાળ ગામમાં કાર્યરત ડ્રગ્સ બનાવતી એક મોટી ગુપ્ત લેબોરેટરીને DRI એ પકડી પાડી છે. આ ઓપરેશન દરમિયાન અંદાજે ૧,૧૦૦ કિલો ડ્રગ્સ અને પ્રીકરર કેમિકલ્સની સાથે ઉત્પાદન માટેના સાધનો પણ જપ્ત કરવામાં આવ્યા છે. આ કેસમાં બે વ્યક્તિઓની ધરપકડ કરવામાં આવી છે.

PIB દિલ્હીના અહેવાલ મુજબ, ચોક્કસ ગુપ્ત માહિતીના આધારે DRI ના અધિકારીઓની એક મોટી ટીમે યુપી એટીએસ (ATS) ની મદદથી ૨૯ ઓક્ટોબર ૨૦૨૬ના વહેલી સવારે આ સંયુક્ત ઓપરેશન હાથ ધર્યું હતું. શંકાસ્પદ જગ્યાએ સર્ચ ઓપરેશન દરમિયાન સિન્થેટિક ડ્રગ્સ બનાવવા માટેની સંપૂર્ણ કાર્યરત લેબોરેટરી મળી આવી હતી. તપાસ દરમિયાન અંદાજે ૧૮૪ કિલો અર્ધ-તૈયાર ડ્રગ્સ અને ૫૮૨ કિલો જેટલા પ્રીકરર કેમિકલ્સ તેમજ ઉત્પાદન પ્રક્રિયામાં વપરાતા સાધનો મળી આવ્યા હતા.

આ કાર્યવાહીના ભાગરૂપે આરોપીઓના રહેણાંક સ્થળોએ પણ તપાસ કરવામાં આવી હતી. એક આરોપીના ઘરેથી અંદાજે ૧૫.૪ કિલો તૈયાર મેથક્વાલોન (methaqualone), ૧૫૩ કિલો કેમિકલ્સ અને ઉત્પાદન માટે વપરાતું મશીન મળી આવ્યું હતું. અન્ય એક આરોપીના સ્થળેથી તપાસ દરમિયાન વધુ ૧૬૮ કિલો પ્રીકરર કેમિકલ્સ જપ્ત કરવામાં આવ્યા હતા. આ બંને વ્યક્તિઓની NDPS એક્ટ, ૧૯૮૫ ની જોગવાઈઓ હેઠળ ધરપકડ કરવામાં આવી છે.

તૈયાર ડ્રગ્સ, અર્ધ-તૈયાર સામગ્રી, કેમિકલ્સ અને સાધનોની આટલી મોટી માત્રામાં રિકવરી સૂચવે છે કે આ એક સંગઠિત ગેરકાયદેસર ડ્રગ્સ ઉત્પાદન પ્રવૃત્તિ હતી. આ ઓપરેશન દ્વારા ડ્રગ્સના ઉત્પાદન માટેના મોટા નેટવર્કને તોડી પાડવામાં આવ્યું છે અને ગેરકાયદેસર સપ્લાય ચેઈનમાંથી મોટી માત્રામાં નશીલા પદાર્થો દૂર કરવામાં આવ્યા છે, જેનાથી વધુ ડ્રગ્સ બનતા અટકાવી શકાયા છે. DRI ના જણાવ્યા અનુસાર, તેઓ માદક દ્રવ્યો અને સાયકોટ્રોપિક પદાર્થોની હેરાફેરી સામે લડવા માટે આવા નેટવર્કને તોડવા માટે પ્રતિબદ્ધ છે.