ભારતે આસિયાન દેશોને આતંકવાદ વિરોધી કુશળતા વહેંચવાની કરી ઓફર

દક્ષિણપૂર્વ એશિયા સાથે સુરક્ષા સહયોગનો વ્યાપ વધારવાની દિશામાં ભારતે મહત્વનું પગલું ભર્યું છે. ભારતે આસિયાન દેશોને પોતાની આતંકવાદ વિરોધી લડાઈની કુશળતા વહેંચવાની ઓફર કરી છે. સાઉથ ચાઇના મોર્નિંગ પોસ્ટના અહેવાલ મુજબ, ભારતીય રક્ષામંત્રી રાજનાથ સિંહે ગુરુવારે સેબુ ખાતે યોજાયેલી આસિયાન ડિફેન્સ મિનિસ્ટર્સ મીટિંગ-પ્લસ એટલે કે એડમ-પ્લસ (ADMM-Plus) ની બેઠકમાં આ પ્રસ્તાવ મૂક્યો હતો.

આ બેઠક દરમિયાન ભારતીય રક્ષામંત્રીએ ભારતની આતંકવાદ વિરોધી ક્ષમતાઓના ઉદાહરણ તરીકે 'ઓપરેશન સિંદૂર'નો ઉલ્લેખ કર્યો હતો અને આ ક્ષેત્રમાં ભારતનું જ્ઞાન તથા અનુભવ અન્ય દેશો સાથે શેર કરવાની પેશકશ કરી હતી. જોકે, સંરક્ષણ વિશ્લેષકોનું માનવું છે કે ભારતનો આ અનુભવ આસિયાન દેશોની જરૂરિયાતોને માત્ર આંશિક રીતે જ સંતોષી શકશે.

વિશ્લેષકોના મતે, ભારત અને આસિયાન દેશો વચ્ચે ખતરા અંગેની દ્રષ્ટિ (થ્રેટ પર્સેપ્શન) તેમજ ઘરેલુ પ્રાથમિકતાઓમાં તફાવત રહેલો છે, જેના કારણે 'વન સાઈઝ ફિટ્સ ઓલ' એટલે કે તમામ માટે એક સમાન અભિગમ અપનાવવો મુશ્કેલ સાબિત થઈ શકે છે. આસિયાન ક્ષેત્રની સુરક્ષા જરૂરિયાતો ભારત કરતા અલગ હોઈ શકે છે, છતાં આ ઓફરથી બંને પક્ષો વચ્ચે સંરક્ષણ ક્ષેત્રે સહયોગ વધારવાની નવી દિશાઓ ચોક્કસપણે ખુલી રહી છે.