ચૈતર વસાવાના ભાઈએ ઝેરી દવા પીને આત્મહત્યાનો પ્રયાસ કર્યો

ડેડિયાપાડાના ધારાસભ્ય ચૈતર વસાવાના પરિવારમાંથી એક ગંભીર સમાચાર સામે આવ્યા છે. તેમના ભાઈ શાંતિલાલ વસાવાએ કોઈ અગમ્ય કારણોસર ઝેરી દવા ગટગટાવીને આત્મહત્યા કરવાનો પ્રયાસ કર્યો છે. આ ઘટના બાદ તેમને અત્યંત નાજુક અને ગંભીર હાલતમાં સુરતની નવી સિવિલ હોસ્પિટલમાં ખસેડવામાં આવ્યા છે.

શાંતિલાલ વસાવા હાલ સિવિલ હોસ્પિટલના સ્પેશિયલ વોર્ડમાં સારવાર હેઠળ છે અને તેમની સ્થિતિ જિંદગી અને મોત વચ્ચે ઝોલાં ખાઈ રહી છે. સ્થાનિક સ્તરે પ્રાથમિક સારવાર આપવામાં આવી હતી, પરંતુ તબિયત વધુ લથડતા તેમને તાત્કાલિક સુરતની નવી સિવિલ હોસ્પિટલમાં દાખલ કરવામાં આવ્યા હતા. ત્યાં નિષ્ણાત તબીબોની ટીમ દ્વારા તેમની સઘન સારવાર કરવામાં આવી રહી છે.

ભાઈની અત્યંત નાજુક અને ચિંતાજનક સ્થિતિને ધ્યાને રાખીને ધારાસભ્ય ચૈતર વસાવાએ તાત્કાલિક જામીન મેળવવા માટે સુપ્રીમ કોર્ટના દ્વાર ખખડાવ્યા હતા. તેઓ ભાઈની પડખે ઊભા રહેવા માટે જામીન અરજી કરી હતી. સુપ્રીમ કોર્ટે માનવીય અભિગમ દાખવીને પરિસ્થિતિની ગંભીરતા સમજી હતી અને ચૈતર વસાવાને ૩ દિવસના વચગાળાના જામીન મંજૂર કર્યા હતા.

સુપ્રીમ કોર્ટમાંથી મંજૂરી મળ્યા બાદ ચૈતર વસાવા ભારે બંદોબસ્ત વચ્ચે સુરત સિવિલ હોસ્પિટલ પહોંચ્યા હતા. શાંતિલાલ વસાવા દ્વારા અચાનક ઝેરી દવા પી લેતા સમગ્ર પરિવારજનોમાં દોડધામ મચી ગઈ હતી. હાલ હોસ્પિટલમાં તબીબી ટીમ દ્વારા તેમની સારવાર ચાલુ છે.