પાલેજ પોસ્ટ ઓફિસમાં ત્રણ દિવસથી સર્વર ઠપ થતા લોકોમાં રોષ

ભરૂચના પાલેજ સ્થિત મુખ્ય પોસ્ટ ઓફિસમાં છેલ્લા ત્રણ દિવસથી ટેકનિકલ ખામી અને સર્વર ડાઉન હોવાને કારણે ખાતાધારકોને ભારે હાલાકી ભોગવવી પડી રહી છે. સર્વરની સમસ્યાને લીધે લોકો પોતાના ખાતામાંથી નાણાં ઉપાડી શકતા નથી, જેના કારણે પાલેજ અને આસપાસના ગ્રામ્ય વિસ્તારોના લોકોમાં તંત્ર સામે ભારે રોષ જોવા મળી રહ્યો છે.

દિવાળી જેવા મોટા તહેવારો નજીક હોવાથી મધ્યમ વર્ગના લોકો, નાના વેપારીઓ અને વરિષ્ઠ નાગરિકો ખરીદી માટે પોસ્ટ ઓફિસના બચત ખાતા પર નિર્ભર હોય છે. ગ્રાહકો જ્યારે પૈસા ઉપાડવા માટે કલાકો સુધી લાઈનોમાં ઉભા રહે છે, ત્યારે કર્મચારીઓ દ્વારા લિંક નથી અથવા સર્વર ડાઉન છે તેમ કહી દેવામાં આવે છે. આના કારણે દૂરના ગ્રામ્ય વિસ્તારોથી આવતા ખાતેદારોએ ખાલી હાથે પરત ફરવું પડે છે.

પોસ્ટ ઓફિસ આવેલા ખાતેદારો અને મહિલાઓએ પોતાનો આક્રોશ વ્યક્ત કરતા જણાવ્યું હતું કે, આ તેમના હકના રૂપિયા છે અને તેઓ કોઈ લોન કે ભીખ નથી માંગતા. જો દિવાળી જેવા તહેવારો સમયે જ તેઓ પોતાના પૈસા વાપરી શકે નહીં, તો આ બચતનો શું ફાયદો? ખાસ કરીને વરિષ્ઠ નાગરિકો જેઓ પેન્શન અથવા માસિક આવક યોજનાના વ્યાજના ભરોસે તહેવાર ઉજવવાનું આયોજન કરે છે, તેમને મોટી મુશ્કેલી પડી રહી છે.

સંદેશના અહેવાલ મુજબ, તહેવારોની સીઝનમાં આ ટેકનિકલ ખામી સામાન્ય અને મધ્યમ વર્ગની પ્રજા માટે મોટી મુશ્કેલી ઉભી કરી રહી છે.