યુજીસી ગાઈડલાઈન્સ ૨૦૨૬ ની સમીક્ષા થશે, જેપી નડ્ડા સાથેની બેઠક બાદ કરણી સેનાનો દાવો

યુજીસી (UGC) ગાઈડલાઈન્સ ૨૦૨૬ ને લઈને ચાલી રહેલા વિવાદ વચ્ચે સર્વણ મહાપંચાયત સમિતિ અને સરકારના પ્રતિનિધિમંડળ વચ્ચે બીજા તબક્કાની મહત્વની વાતચીત સંપન્ન થઈ છે. કેન્દ્રીય મંત્રી જે.પી. નડ્ડા સાથેની આ મુલાકાત બાદ ક્ષત્રિય કરણી સેનાના રાષ્ટ્રીય અધ્યક્ષ ડો. રાજ શેખાવતે એક નિવેદન જાહેર કર્યું છે. તેમણે આ મુલાકાતને સામૂહિક સંઘર્ષ અને સંવાદની એક મોટી ઉપલબ્ધિ ગણાવી છે.

એબીપી ન્યૂઝના અહેવાલ મુજબ, ડો. રાજ શેખાવતે એક્સ (X) પર પોસ્ટ કરીને જણાવ્યું હતું કે, બેઠક દરમિયાન સરકારના પ્રતિનિધિમંડળે સ્પષ્ટ કર્યું છે કે યુજીસી ગાઈડલાઈન્સ ૨૦૨૬ ને તેના હાલના સ્વરૂપમાં લાગુ કરવામાં આવશે નહીં. આ નિયમો પર પુનઃવિચાર કરવા માટે એક સમીક્ષા સમિતિની રચના કરવામાં આવશે. આ સમિતિ તમામની સમાનતા, બંધારણીય અધિકારોનું રક્ષણ અને સુપ્રીમ કોર્ટના દિશાનિર્દેશોનું સંપૂર્ણ પાલન સુનિશ્ચિત કરશે.

ડો. રાજ શેખાવતે વધુમાં ઉમેર્યું કે સરકારે યુજીસીના વિષય પર સકારાત્મક અને સંવેદનશીલ અભિગમ અપનાવીને ગંભીરતાથી કામ કરવાનો ભરોસો આપ્યો છે. તેમણે જણાવ્યું કે આ એ જ આશ્વાસન છે જે સરકારે ૨૦ સપ્ટેમ્બરના રોજ આપ્યું હતું અને ત્યારબાદ ૫ નવેમ્બરના રોજ સુપ્રીમ કોર્ટમાં પણ પોતાની વાત રજૂ કરી હતી. તેમણે આ સફળતાને કોઈ એક વ્યક્તિ કે સંસ્થાની નહીં, પરંતુ ન્યાય, સમાનતા અને નિષ્પક્ષ વ્યવસ્થા માટે અવાજ ઉઠાવનારા તમામ દેશવાસીઓની સફળતા ગણાવી હતી.

હવે કરણી સેનાની આગામી અપેક્ષા જરૂરી સુધારાઓ માટે સમિતિની રચના, યુજીસી ગાઈડલાઈન્સ ૨૦૨૬ ના નિષ્પક્ષ પુનઃવિચાર અને સામાન્ય વર્ગને તેના બંધારણીય અધિકારો તેમજ ન્યાય સુનિશ્ચિત કરાવવાની છે.

બીજી તરફ, યુજીસી દ્વારા બનાવવામાં આવેલા નવા નિયમોને પડકારતી અરજીઓ પર ગુરુવાર, ૫ નવેમ્બર ૨૦૨૬ના રોજ સુપ્રીમ કોર્ટમાં સુનાવણી મોકૂફ રાખવામાં આવી હતી. આ દરમિયાન કેન્દ્ર સરકારે અદાલતને જાણ કરી હતી કે તે વિવાદિત યુજીસી નિયમોની ફરીથી સમીક્ષા કરશે અને આ માટે એક સમિતિ પણ ગઠિત કરવામાં આવશે. કેન્દ્ર સરકાર તરફથી હાજર રહેલા સોલિસિટર જનરલ તુષાર મહેતાએ સુપ્રીમ કોર્ટને આશ્વાસન આપ્યું હતું કે નિયમોની સમીક્ષા દરમિયાન તમામ વર્ગોના વિદ્યાર્થીઓના હિતોનું ધ્યાન રાખવામાં આવશે. તેમણે ખાતરી આપી હતી કે કોઈ પણ વર્ગનો વિદ્યાર્થી પોતાને અસંતુષ્ટ, અસુરક્ષિત કે ડરેલો અનુભવે નહીં.

આ બાબતે ચીફ જસ્ટિસે પણ અવલોકન કર્યું હતું કે દરેક વિદ્યાર્થીના હિતોનું રક્ષણ કરવું જરૂરી છે. તેમણે ભારપૂર્વક જણાવ્યું હતું કે નિયમો બનાવતી વખતે દેશની યુવા પેઢીના હિતો અને તેમની લાગણીઓનું ખાસ ધ્યાન રાખવું જોઈએ.