રાજકોટ સિવિલ હોસ્પિટલમાં કેમેરા જોતા જ સુધરી ગઈ વ્યવસ્થા

રાજકોટ સિવિલ હોસ્પિટલમાં દર્દીઓને મળતી પ્રાથમિક સુવિધાઓ અને સ્ટ્રેચર કે વ્હીલચેરની ઉપલબ્ધતા અંગે ગંભીર પ્રશ્નો સર્જાયા છે. અગાઉ એક વૃદ્ધ મહિલા દ્વારા પોતાના બીમાર પતિને જાતે સ્ટ્રેચર પર લઈ જવાનો કિસ્સો સામે આવ્યા બાદ હોસ્પિટલના વહીવટીતંત્રની કામગીરી સામે આકરા સવાલો ઉભા થયા હતા. આ પરિસ્થિતિની સત્યતા તપાસવા માટે ટીવી૯ ગુજરાતીની ટીમે હોસ્પિટલમાં રિયાલિટી ચેક કર્યું હતું.

તપાસ દરમિયાન શરૂઆતમાં અનેક દર્દીઓના સ્વજનો પોતે જ સ્ટ્રેચર અને વ્હીલચેર ધકેલીને દર્દીઓને લઈ જતા નજરે પડ્યા હતા. જોકે, જેવી ટીવી૯ની ટીમ અને કેમેરા હોસ્પિટલ પરિસરમાં દાખલ થયા, કે તરત જ તંત્ર સક્રિય થઈ ગયું હોય તેવા દ્રશ્યો જોવા મળ્યા હતા. અગાઉ જે દર્દીઓ સાથે કોઈ મદદનીશ નહોતા, તેઓ અચાનક કેમેરા આવતા જ એટેન્ડન્ટ સાથે જોવા મળ્યા હતા. આ ઘટનાએ હોસ્પિટલની નિયમિત વ્યવસ્થા સામે શંકા પેદા કરી છે કે શું માત્ર કેમેરા સામે જ તંત્ર સક્રિય થાય છે કે પછી દર્દીઓને ખરેખર યોગ્ય મદદ મળે છે.