ગુડગાંવના સેક્ટર-૭૧માં ગોલ્ફ કોર્સના જળાશયમાં ડૂબી જવાથી બે સગીર છોકરીઓનાં મોત

હિન્દુસ્તાન ટાઇમ્સના અહેવાલ મુજબ, ગુડગાંવના સેક્ટર-૭૧માં એક આગામી રેસિડેન્શિયલ સોસાયટીમાં આવેલા ગોલ્ફ કોર્સના જળાશયમાં ન્હાવા પડેલી બે ૧૨ વર્ષની છોકરીઓનું ડૂબી જવાથી મૃત્યુ થયું છે. મંગળવારે બપોરે ૧૨.૩૦ વાગ્યાથી ૧ વાગ્યા વચ્ચેના સમયગાળા દરમિયાન આ દુર્ઘટના બની હોવાનું પોલીસે જણાવ્યું હતું. મૃતક બંને છોકરીઓ મૂળ બિહારની રહેવાસી હતી.

પોલીસના જણાવ્યા અનુસાર, ચાર બાળકોનું એક જૂથ સેક્ટર-૭૧ સ્થિત આ જગ્યાની પરિઘની દીવાલમાં પડેલી એક સાંકડી જગ્યામાંથી ગ્રીન એરિયા પરિસરમાં ઘૂસી ગયું હતું અને ત્યાંના જળાશયમાં ન્હાવા લાગ્યું હતું. આ ગ્રીન એરિયાની આસપાસ ઈંટોની દીવાલ અને તારથી ફેન્સિંગ કરવામાં આવી હતી. એક વરિષ્ઠ પોલીસ અધિકારીએ જણાવ્યું હતું કે ફેન્સિંગની વચ્ચે એક ઝાડ હતું જેના કારણે ત્યાં એક સાંકડી જગ્યા બની ગઈ હતી અને બાળકો ત્યાંથી અંદર પ્રવેશવામાં સફળ રહ્યા હતા.

નાહતી વખતે તેમાંથી બે છોકરીઓ લપસી ગઈ અને ડૂબવા લાગી, જ્યારે અન્ય બે છોકરીઓ ગભરાઈને પોતાના પરિવારજનોને જાણ કરવા માટે ઘટનાસ્થળેથી ભાગી ગઈ હતી. આ પછી માતા-પિતા અને સ્થળ પર હાજર અન્ય લોકોએ પોલીસને જાણ કરી હતી. પોલીસ તાત્કાલિક ઘટનાસ્થળે પહોંચી હતી અને છોકરીઓને જળાશયમાંથી બહાર કાઢી હતી.

બંને સગીરાઓને સેક્ટર ૧૦એ સ્થિત સિવિલ હોસ્પિટલમાં લઈ જવામાં આવી હતી, જ્યાં તબીબોએ તેમને મૃત જાહેર કરી હતી. ગુડગાંવ પોલીસના જનસંપર્ક અધિકારી સંદીપ તુરાને જણાવ્યું હતું કે પીડિતોના માતા-પિતાની ફરિયાદના આધારે મંગળવારે રાત્રે બાદશાહપુર પોલીસ સ્ટેશનમાં ભારતીય ન્યાય સંહિતાનીકલમ ૧૦૬ (બેદરકારીથી મૃત્યુ નિપજાવવું) અને ૩(૫) (સમાન ઈરાદો) હેઠળ જવાબદાર વ્યક્તિઓ સામે ગુનો નોંધવામાં આવ્યો છે.

સંદીપ તુરાને વધુમાં જણાવ્યું હતું કે આ જગ્યા સુરક્ષિત રાખવા માટે જવાબદાર લોકો સામે કાયદેસરની કાર્યવાહી કરવામાં આવશે. બુધવારે પોસ્ટમોર્ટમ કર્યા બાદ બંનેના મૃતદેહ પરિજનોને સોંપવામાં આવશે.