નવા વાડજમાં ફટાકડા ફોડવા બાબતે મહિલા પીએસઆઈ અને ભાજપ કોર્પોરેટર વચ્ચે ઘર્ષણ

સંદેશના અહેવાલ મુજબ, અમદાવાદના નવા વાડજ વિસ્તારમાં આવેલા એક મકાનમાં ફટાકડા ફોડવા જેવી સામાન્ય બાબતમાં કારને થયેલા નુકસાન અંગે બોલાચાલી શરૂ થઈ હતી જે બાદમાં ઉગ્ર ઝઘડામાં ફેરવાઈ ગઈ હતી. આ સમગ્ર ઘટનાને લઈને વાડજ પોલીસ સ્ટેશન વિસ્તારમાં રહેતા મહિલા પીએસઆઈ ચુડાસમાએ સ્થાનિક ભાજપ કોર્પોરેટર વિરાટ પુરોહિફ અને તેમના સાથીદારો વિરુદ્ધ વાડજ પોલીસ સ્ટેશનમાં ગંભીર આક્ષેપો કરતી લેખિત અરજી આપી છે.

મહિલા પીએસઆઈ ચુડાસમા ઘરમાં તેમની પુત્રી સાથે એકલા રહે છે. તેમનો આક્ષેપ છે કે ભાજપ કોર્પોરેટર વિરાટ પુરોહિત અને તેમના સાથીદારો તેમના ઘરે આવીને દદાગીરી કરી હતી, ગેરવર્તણૂક કરી હતી અને ઝપાઝટી કરી હતી. આ ઘટના બન્યા બાદ મહિલા પીએસઆઈએ તુરંત જ ૧૧૨ પર ફોન કરીને પોલીસ કંટ્રોલ રૂમની મદદ માંગી હતી અને ઈજા કે માનસિક આઘાતને કારણે તેમને સારવાર માટે સોલા સિવિલ હોસ્પિટલ ખસેડવામાં આવ્યા હતા. આ સમગ્ર ઘટનાના સોસાયટીના સીસીટીવી ફૂટેજ પણ સામે આવ્યા છે.

બીજી બાજુ, ભાજપ કોર્પોરેટર વિરાટ પુરોહિતે પોતાની બાજુ રજૂ કરતા જણાવ્યું હતું કે તેમની સામે કરવામાં આવેલા ઝઘડા અને ગેરવર્તણૂકના તમામ આક્ષેપો બિલકુલ પાયાવિહોણા અને ખોટા છે. આજે ભાજપ કોર્પોરેટર વિરાટ પુરોહિત તેમજ આ કેસમાં સંડોવાયેલા સોસાયટીના રહીશો દેવાંગ પટેલ અને હિરાલ પટેલે મીડિયા સમક્ષ આવીને પોતાના નિવેદનો આપ્યા હતા અને તમામ આક્ષેપો ફગાવી દીધા હતા.

આ મામલે વાડજ પોલીસ સ્ટેશનમાં કોર્પોરેટર વિરાટ પુરોહિત અને તેમના સાથીદારો સામે અરજીઓ આપવામાં આવી છે તેમજ સામે પક્ષે પણ અરજી આપવામાં આવી છે, જેના કારણે પોલીસે તપાસ શરૂ કરી છે અને મામલો ગરમાયો છે. મહિલા પીએસઆઈ દ્વારા એવો દાવો કરવામાં આવ્યો હતો કે હજુ સુધી સત્તાવાર ફરિયાદ લેવામાં આવી નથી, જોકે ગઈકાલે હાથ પર પટ્ટી બાંધેલો ફોટો સામે આવ્યા પછી આજે તેઓ જાતે જ કાર ચલાવતા નજરે પડ્યા હતા, જેને લઈને અનેક પ્રકારની ચર્ચાઓ વહેતી થઈ છે.