શેલા હિટ એન્ડ રન કેસમાં ભાજપના ધારાસભ્યનો ભત્રીજો ઝડપાયો, તાત્કાલિક જામીન મળ્યા

સંદેશના અહેવાલ મુજબ, અમદાવાદના બોપલ પોલીસ સ્ટેશન વિસ્તારમાં આવેલા શિલાજ સર્કલ પાસે ગુરુકૃપા ટ્રેડર્સ ચાર રસ્તા નજીક વહેલી સવારે ૭ વાગ્યે એક હિટ એન્ડ રનની ઘટના બની હતી. આ અકસ્માતમાં પૂરપાટ ઝડપે આવી રહેલી રેન્જ રોવર કારના ચાલકે એક રેપિડો બાઈકને જોરદાર ટક્કર મારી હતી, જેના કારણે બાઈક પાછળ બેઠેલા એક નિર્દોષ મુસાફરનું કરુણ મોત નીપજ્યું હતું.

પોલીસ સૂત્રોના જણાવ્યા અનુસાર, વહેલી સવારે આશરે ૭ વાગ્યાના અરસામાં રેપિડો ચાલક પ્રદીપ કુમાર પોતાની બાઈક લઈને ગુરુકૃપા ટ્રેડર્સ ચાર રસ્તા પાસેથી પસાર થઈ રહ્યા હતા. તેમની બાઈક પાછળ ૩૫ વર્ષીય હર્ષદકુમાર પૂર્બિયા મુસાફર તરીકે બેઠા હતા. આ દરમિયાન અચાનક જ રેન્જ રોવર કારના ચાલકે રેપિડો બાઈકને જોરદાર ટક્કર મારી દીધી હતી. આ ભીષણ ટક્કરને કારણે રેપિડો ચાલક પ્રદીપ કુમાર અને મુસાફર હર્ષદકુમાર બંને અકસ્માતનો ભોગ બન્યા હતા. જમીન પર પછડાયેલા હર્ષદકુમાર પૂર્બિયાને ગંભીર ઇજાઓ થવાથી તેમનું ઘટનાસ્થળે જ મોત થયું હતું. મૃતક હર્ષદકુમાર શાસ્ત્રીનગરના રહેવાસી હતા અને મૂળ સુરેન્દ્રનગરના ધ્રાંગધ્રાના વતની હતા.

ઘટનાને અંજામ આપ્યા બાદ રેન્જ રોવર ગાડીનો ચાલક કાર લઈને તુરંત જ મૌકે પરથી ફરાર થઈ ગયો હતો. બનાવની જાણ થતાં જ બોપલ પોલીસ સ્ટેશનનો કાફલો તાત્કાલિક ઘટનાસ્થળે દોડી આવ્યો હતો અને મામલાની તપાસ શરૂ કરી હતી. પોલીસે અકસ્માત સ્થળ તથા આસપાસના વિસ્તારના સીસીટીવી ફૂટેજની ઝીણવટભરી ચકાસણી કરી હતી. સીસીટીવી ફૂટેજમાં દેખાઈ રહેલી રેન્જ રોવર કારની નંબર પ્લેટના આધારે પોલીસે વાહન ચાલકને પકડવા માટે ચક્રો ગતિમાન કર્યા હતા. આખરે પોલીસે નંબર પ્લેટના આધારે આરોપી રાઘવેન્દ્ર કુશવાહાની ઓળખ કરી લીધી હતી.

બોપલ પોલીસે આ હિટ એન્ડ રન પ્રકરણમાં ત્વરિત કાર્યવાહી કરીને આરોપી રાઘવેન્દ્ર કુશવાહાને તેની રેન્જ રોવર કાર સાથે ઝડપી લીધો હતો. પોલીસ તપાસ દરમિયાન ખુલાસો થયો હતો કે પકડાયેલ આરોપી રાઘવેન્દ્ર કુશવાહા બાપુનગરના ભાજપના ધારાસભ્ય દિનેશસિંહ કુશવાહાનો ભત્રીજો છે. સીસીટીવી ફૂટેજના આધારે કાર સાથે આરોપી રાઘવેન્દ્ર કુશવાહાની ધરપકડ કર્યા બાદ બોપલ પોલીસે તેને જામીન પર મુક્ત કરી દીધો હતો.