હિમાચલમાં જાન્યુઆરીથી સપ્ટેમ્બર દરમિયાન ગુમ થયેલા ૧,૩૨૮માંથી ૧,૧૭૨ લોકો મળ્યા

ઇન્ડિયા ટુડેના અહેવાલ મુજબ, હિમાચલ પ્રદેશ પોલીસ દ્વારા ચાલુ વર્ષે જાન્યુઆરીથી સપ્ટેમ્બર એમ નવ મહિનાના સમયગાળા દરમિયાન ગુમ થયેલા કુલ ૧,૩૨૮ લોકોમાંથી ૧,૧૭૨ લોકોને શોધી કાઢવામાં આવ્યા છે. આ સાથે રાજ્યમાં ગુમ થયેલા લોકોને શોધી કાઢવાનો દર ૮૮.૭ ટકા જેટલો ઊંચો નોંધાયો છે, જ્યારે હજુ પણ ૧૫૬ લોકો ગુમ હોવાનું જણાયું છે અને તેમની ભાળ મેળવવાની બાકી છે.

અધિકારીઓએ પ્રેસ ટ્રસ્ટ ઓફ ઇન્ડિયાને આપેલી માહિતી મુજબ, આ નવ મહિનાના સમયગાળામાં પોલીસે ગુમ થવાના કુલ ૮૯૩ કેસો નોંધ્યા હતા જેમાં ૧૫૬ લોકોની શોધખોળ ઉપરાંત કુલ ૧,૩૨૮ વ્યક્તિઓ સામેલ હતી. સત્તાવાર આંકડાઓ અનુસાર, જે લોકોને સુરક્ષિત શોધી કાઢવામાં આવ્યા છે તેમાં ૭૨૨ પુખ્ત વયના લોકો અને ૪૭૦ બાળકોનો સમાવેશ થાય છે.

આ શોધાયેલા લોકોમાંથી આશરે ૨૦ ટકા લોકોને ઘટનાના ૨૪ કલાકની અંદર જ શોધી લેવામાં આવ્યા હતા. આ ઉપરાંત, ૨૦.૯ ટકા લોકોને ૨૪ થી ૭૨ કલાકની વચ્ચે શોધી કાઢવામાં આવ્યા હતા, જ્યારે બાકીના ૪૭.૯ ટકા લોકોને ૭૨ કલાક પછી શોધી શકાયા હોવાનું અહેવાલમાં જણાવવામાં આવ્યું છે.

રાજ્યના પોલીસ મહાનિર્દેશક અશોક તિવારીએ એક નિવેદનમાં જણાવ્યું હતું કે, સુપ્રીમ દ્વારા ગત ૨૨ મે ૨૦૨૬ના રોજ જી. ગણેશ વિરુદ્ધ તામિલનાડુ રાજ્ય અને અન્ય કેસમાં આપવામાં આવેલા નિર્દેશો બાદ રાજ્યમાં ગુમ થયેલા વ્યક્તિઓના કેસોની નોંધણી, તપાસ અને શોધખોળ કરવાની સિસ્ટમને વધુ મજબૂત બનાવવામાં આવી છે. અદાલતે ભારપૂર્વક જણાવ્યું હતું કે કોઈપણ પ્રકારના ફરજિયાત રાહ જોવાની અવધિનો આગ્રહ રાખ્યા વિના, ગુમ થયેલી વ્યક્તિ વિશે માહિતી મળતાની સાથે જ તાત્કાલિક એફઆઈઆર નોંધવી અનિવાર્ય છે.

આ માર્ગદર્શિકાને અનુસરીને, પોલીસે ૬ જૂનના રોજ તમામ ક્ષેત્રિય એકમોને વિગતવાર સૂચનાઓ જારી કરી હતી. જેમાં એફઆઈઆરની તાત્કાલિક નોંધણી, ત્વરિત શોધખોળ અભિયાન, ગુમ થયેલા બાળકોના કેસો પર વિશેષ ધ્યાન અને વરિષ્ઠ અધિકારીઓ દ્વારા નિયમિત મોનિટરિંગ કરવાના આદેશો આપવામાં આવ્યા હતા.

ડીજીપીએ જણાવ્યું હતું કે પોલીસે ઝડપી શોધખોળ, માહિતીનું સમયસર આદાનપ્રદાન, ટેકનોલોજીનો અસરકારક ઉપયોગ અને પોલીસ સ્ટેશનો, જિલ્લાઓ તેમજ પડોશી રાજ્યો વચ્ચે પરસ્પર સંકલન પર વિશેષ ધ્યાન કેન્દ્રિત કર્યું છે. તેમણે નાગરિકોને અપીલ કરી છે કે તેઓ બાળકો સહિત કોઈપણ વ્યક્તિ ગુમ થવાના કિસ્સામાં જરાય વિલંબ કર્યા વિના પોલીસનો સંપર્ક કરે. તેમણે એ ભ્રમણા સામે પણ ચેતવણી આપી હતી કે પોલીસ ફરિયાદ નોંધાવતા પહેલા વ્યક્તિને ગુમ થયાના ૨૪ કલાક વીતી જવા જરૂરી છે.