સિંધુ ભવન રોડ પર ₹૫૭૦ કરોડના ખર્ચે બનશે અમદાવાદ સિટી સ્ક્વેર ટાવર

અમદાવાદ મ્યુનિસિપલ કોર્પોરેશને સિંધુ ભવન રોડ પર ₹૫૭૦ કરોડના ખર્ચે 'અમદાવાદ સિટી સ્ક્વેર' નામના આઇકોનિક ટાવર પ્રોજેક્ટનું નિર્માણ કરવાનું આયોજન કર્યું છે. આ પ્રોજેક્ટ માટે ૨૫ ઓક્ટોબરે ટેન્ડર પ્રસિદ્ધ કરવામાં આવ્યા છે. ધ ટાઇમ્સ ઓફ ઇન્ડિયાના અહેવાલ મુજબ, આ ટાવરની ઊંચાઈમાં ૫ મીટરનો ઘટાડો કરવામાં આવ્યો છે અને હવે તે ૧૭૫ મીટર ઊંચો હશે.

સંદેશના અહેવાલ મુજબ, બે પ્રિ-બિડ મીટિંગના આયોજન બાદ અઢી મહિનામાં ટેન્ડરની પ્રક્રિયા ફાઇનલ કરવામાં આવશે. એકવાર કામગીરી શરૂ થયા બાદ, આ પ્રોજેક્ટને પૂર્ણ કરવા માટે ૪૨ મહિનાનો સમય નક્કી કરવામાં આવ્યો છે.

આ પ્રોજેક્ટ માટે કુલ ૧૩,૧૪૪ ચોરસ મીટરનો પ્લોટ ફાળવવામાં આવ્યો છે, જેમાંથી ૧૨,૦૯૧ ચોરસ મીટરમાં બાંધકામ કરવામાં આવશે. પાર્કિંગની સુવિધા માટે ત્રણ બેઝમેન્ટ બનાવવામાં આવશે, જેમાં ૩૮૫ કાર અને ૧૧૦૯ ટુ-વ્હીલર પાર્ક કરી શકાશે. આ ઉપરાંત, ટાવરની સામે વધારાનું ૪૫૦ કારનું પાર્કિંગ પણ રાખવામાં આવશે.

અમદાવાદ સિટી સ્ક્વેરના આ આધુનિક પ્રોજેક્ટમાં અનેક સુવિધાઓનો સમાવેશ કરવામાં આવ્યો છે. આ ટાવરમાં ૫૦ દુકાનો, આર્ટ ગેલેરી અને ટેરેસ કેફે હશે. ખાવા-પીવા માટે ૪૦ મીટરના વિસ્તારમાં ૧૨૦૦ લોકોની ક્ષમતા ધરાવતી બે માળની રેસ્ટોરન્ટ બનાવવામાં આવશે. આ ઉપરાંત, ૧૭૫ મીટરની ઊંચાઈ પર સ્કાય ડેક-વોક બનાવવામાં આવશે. પ્રોજેક્ટમાં ૧૭ લિફ્ટ, સોલર ટ્રી અને અર્બન પ્લાઝા જેવી સુવિધાઓ પણ સામેલ છે.

જોકે, આ પ્રોજેક્ટને લઈને સ્થાનિક સ્તરે વિવાદ પણ જોવા મળી રહ્યો છે. સંદેશના અહેવાલ મુજબ, મ્યુનિસિપલ કમિશનર દ્વારા જાહેરાત કરવામાં આવી હોવા છતાં, સ્ટેન્ડિંગ ચેરમેન અને સભ્યોને આ પ્રોજેક્ટની વિગતો આપવામાં ન આવી હોવાથી તેમની નારાજગીની ચર્ચા ચાલી રહી છે.