વીમા એજન્ટોના કમિશન અને ડિસ્ટ્રિબ્યુશન ખર્ચ માટે IRDAI નવા નિયમો લાવશે

ઇન્સ્યોરન્સ રેગ્યુલેટરી ડેવલપમેન્ટ ઓથોરિટી ઓફ ઇન્ડિયા (IRDAI) વીમા પોલિસી વેચતા એજન્ટોના કમિશન અને વીમા કંપનીઓના ડિસ્ટ્રિબ્યુશન ખર્ચ પર નવા નિયમો લાગુ કરવાની તૈયારી કરી રહી છે. આ નિયમોને અંતિમ સ્વરૂપ આપવામાં આવી રહ્યું છે, જેની સીધી અસર વીમા કંપનીઓ અને તેમના એજન્ટો પર પડી શકે છે. આ નવા નિયમોનો મુખ્ય ઉદ્દેશ્ય વીમા કંપનીઓના ડિસ્ટ્રિબ્યુશન ખર્ચને નિયંત્રિત કરવાનો અને ગ્રાહકોના હિતોનું રક્ષણ કરવાનો છે.

આ પ્રસ્તાવિત ફેરફારો અંગે ભારતીય જીવન વીમા નિગમ (LIC) ના સીઈઓ અને મેનેજિંગ ડિરેક્ટર આર. દોરાઈસ્વામીએ એક ન્યૂઝ એજન્સીને આપેલા ઇન્ટરવ્યુમાં પોતાની પ્રતિક્રિયા આપી હતી. તેમણે જણાવ્યું હતું કે LIC ને આ નવા નિયમોથી બહુ મોટી મુશ્કેલી પડશે તેમ લાગતું નથી, કારણ કે કંપની પહેલેથી જ મોટાભાગની પ્રસ્તાવિત મર્યાદાઓની અંદર કામ કરી રહી છે. દોરાઈસ્વામીના જણાવ્યા અનુસાર, LIC એ હંમેશા પોલિસી વેચવાના નેટવર્ક એટલે કે ડિસ્ટ્રિબ્યુશન પર થતા ખર્ચને મર્યાદિત રાખ્યો છે. કંપની કમિશન સિવાય ડિસ્ટ્રિબ્યુશન સાથે જોડાયેલા અન્ય ખર્ચાઓ પર પણ પોતાની આંતરિક મર્યાદાઓ નક્કી કરે છે.

તેમણે વધુમાં ઉમેર્યું કે IRDAI ના કન્સલ્ટેશન પેપરમાં જે પ્રસ્તાવ રજૂ કરવામાં આવ્યા છે, LIC મોટાભાગના કિસ્સાઓમાં તેના દાયરામાં જ છે. જોકે, તેમણે સ્વીકાર્યું કે કેટલાક ચોક્કસ પ્રોડક્ટ્સ અને રેગ્યુલર પ્રીમિયમ પોલિસીના અમુક સમયગાળામાં ફેરફાર કરવાની જરૂર પડી શકે છે. જો નવા નિયમોના કારણે કોઈ પ્રોડક્ટને પાછી ખેંચવી પડે, તેમાં સુધારો કરવો પડે અથવા તેને ફરીથી ફાઇલ કરવી પડે, તો તેની અસર જોવા મળી શકે છે. જે વીમા કંપનીઓનો ડિસ્ટ્રિબ્યુશન ખર્ચ અત્યારે વધુ છે, તેમણે આ નવા નિયમોના કારણે વધુ દબાણનો સામનો કરવો પડી શકે છે.

એજન્ટો માટે સૌથી મોટો પ્રશ્ન તેમના કમિશનને લઈને છે. હાલમાં IRDAI ના પ્રસ્તાવિત નિયમો પર વિચારણા ચાલી રહી હોવાથી, એજન્ટોના કમિશનમાં કેટલો ઘટાડો થશે અથવા તેમની કમાણી પર કેટલી અસર પડશે તે કહેવું હજુ વહેલું છે. આર. દોરાઈસ્વામીએ સ્પષ્ટ કર્યું હતું કે LIC તેના એજન્ટોના લાંબા ગાળાના હિતોનું રક્ષણ કરવા માંગે છે અને તેમણે એજન્ટોને કંપનીની પ્રગતિના સાથી ગણાવ્યા હતા. LIC એ આ બાબતે નિયમનકારી સંસ્થા (IRDAI) ને પોતાના સૂચનો અને ફીડબેક મોકલી આપ્યા છે. કંપનીને આશા છે કે અંતિમ નિયમો બનાવતી વખતે વીમા કંપનીઓ અને ડિસ્ટ્રિબ્યુશન પાર્ટનર્સની ચિંતાઓ પર ધ્યાન આપવામાં આવશે.

ઐતિહાસિક રીતે જોવામાં આવે તો, અગાઉ કમિશન પર અલગથી મર્યાદાઓ લાગુ હતી. ત્યારબાદ કમિશનની મર્યાદા હટાવી દેવામાં આવી હતી અને એક્સપેન્સિસ ઓફ મેનેજમેન્ટ (EOM) એટલે કે મેનેજમેન્ટના કુલ ખર્ચ સાથે જોડાયેલા નિયમોની વ્યવસ્થા કરવામાં આવી હતી. આ ફેરફાર બાદ કંપનીઓના ડિસ્ટ્રિબ્યુશન ખર્ચમાં વધારો થયો હતો, જેના કારણે હવે IRDAI ફરીથી કમિશન અને ડિસ્ટ્રિબ્યુશન ખર્ચ પર નવા નિયમો લાવવા પર વિચાર કરી રહ્યું છે. દોરાઈસ્વામીના મતે, લાઈફ ઇન્સ્યોરન્સની કિંમત અને વ્યવસાય કરવાની પદ્ધતિને સુધારતા પગલાં સમગ્ર ઉદ્યોગ માટે ફાયદાકારક સાબિત થઈ શકે છે.

LIC ના વ્યવસાયિક પાસાઓની વાત કરીએ તો, કંપનીનું વેલ્યુ ઓફ ન્યૂ બિઝનેસ (VNB) માર્જિન વધીને ૨૨.૩% થયું છે. સરળ શબ્દોમાં કહીએ તો, VNB માર્જિન દ્વારા જાણી શકાય છે કે કંપનીએ નવી વેચેલી પોલિસીઓ દ્વારા ભવિષ્યમાં કેટલો નફો મેળવવાની અપેક્ષા છે. આ સુધારાનું કારણ વધુ સારા પ્રોડક્ટ મિક્સ અને નોન-પાર્ટિસિપેટિંગ પોલિસીઓ પર વધુ ધ્યાન કેન્દ્રિત કરવું તે છે. નોન-પાર્ટિસિપેટિંગ પોલિસીઓમાં પોલિસીધારકને કંપનીના નફામાં ભાગ મળતો નથી, જ્યારે પાર્ટિસિપેટિંગ પોલિસીઓમાં બોનસ અથવા અન્ય લાભો મળી શકે છે. LIC હવે તેના વ્યવસાયમાં આ બંને પ્રકારના પ્રોડક્ટ્સનું પ્રમાણ લગભગ એક-તૃતીયાંશ અને બે-તૃતીયાંશ રાખવાની દિશામાં આગળ વધી રહી છે.

આગામી નાણાકીય વર્ષ ૨૦૨૬-૨૭ માં LIC નો મુખ્ય ફોકસ વિવિધ પ્રકારના વીમા પ્રોડક્ટ્સના વિસ્તરણ પર રહેશે. જેમાં મુખ્યત્વે ઇન્ડિવિજ્યુઅલ ટર્મ ઇન્સ્યોરન્સ, સેવિંગ્સ પ્લાન, એન્યુઇટી અને યુનિટ લિંક્ડ ઇન્સ્યોરન્સ પ્લાન (ULIP) નો સમાવેશ થાય છે. આ પ્રોડક્ટ્સ દ્વારા કંપની પોતાના પોર્ટફોલિયોને વધુ મજબૂત બનાવવાની યોજના ધરાવે છે. આજના સમયમાં વીમા ક્ષેત્રમાં પારદર્શિતા લાવવા અને ખર્ચ ઘટાડવા માટે IRDAI ના આ પગલાં મહત્વના માનવામાં આવે છે, જેનાથી અંતે ગ્રાહકોને વધુ સારી સેવાઓ અને પોલિસીઓ મળી શકે.

આજતકના અહેવાલ મુજબ, આ તમામ ફેરફારો વીમા ઉદ્યોગની કાર્યપદ્ધતિમાં મોટું પરિવર્તન લાવી શકે છે, ખાસ કરીને એજન્ટોની કમાણી અને કંપનીઓના ખર્ચના માળખામાં.