રાજેશ કુમાર અરુણાચલ પ્રદેશના નવા પોલીસ મહાનિદેશક તરીકે કાર્યભાર સંભાળશે

કેન્દ્રીય ગૃહ મંત્રાલયે ૧૯૯૫ બેચના આઈપીએસ અધિકારી રાજેશ કુમારની અરુણાચલ પ્રદેશના નવા પોલીસ મહાનિદેશક (ડીજીપી) તરીકે નિમણૂક કરી છે. બુધવારે બહાર પાડવામાં આવેલા આદેશ મુજબ, રાજેશ કુમાર હવે આ સરહદી રાજ્યની પોલીસ કમાન સંભાળશે. તેઓ શિવ દર્શન સિંહ જમવાલનું સ્થાન લેશે, જેઓ રાજેશ કુમારના જ બેચના અધિકારી છે અને તેમની બદલી દિલ્હી ખાતે કરવામાં આવી છે.

હિન્દુસ્તાન ટાઈમ્સના અહેવાલ મુજબ, કેબિનેટની નિમણૂક સમિતિએ સોમવારે રાજેશ કુમારને સેન્ટ્રલ રિઝર્વ પોલીસ ફોર્સ (સીઆરપીએફ) માંથી તેમના મૂળ એજીએમયુટી (AGMUT) કેડરમાં તાત્કાલિક અસરથી પરત મોકલવાના પ્રસ્તાવને મંજૂરી આપી હતી. રાજેશ કુમાર સીઆરપીએફમાં સ્પેશિયલ ડીજી તરીકે સેવા આપી રહ્યા હતા.

આ નિમણૂક એવા સમયે કરવામાં આવી છે જ્યારે અરુણાચલ પ્રદેશમાં આદિવાસી સમુદાયનો એક વર્ગ સિયાંગ નદી પર પ્રસ્તાવિત ૧૧,૨૦૦ મેગાવોટના બહુહેતુક હાઇડ્રોઇલેક્ટ્રિક પ્રોજેક્ટનો વિરોધ કરી રહ્યો છે. આ પ્રોજેક્ટને ભારતની સૌથી મોટી જળવિદ્યુત યોજનાઓ પૈકીની એક માનવામાં આવે છે. ખાસ કરીને પ્રોજેક્ટથી પ્રભાવિત વિસ્તારોના આદિવાસી આદિ સમુદાયના લોકો આ યોજનાનો સતત વિરોધ કરી રહ્યા છે.

સ્થાનિક લોકોની મુખ્ય ચિંતા તેમના પૂર્વજોના ગામો પાણીમાં ડૂબી જવા, વિસ્થાપન, ખેતીની જમીન અને જંગલોનું નુકસાન તેમજ તેમના પરંપરાગત જીવનશૈલીમાં વિક્ષેપ પડવાની છે. બીજી તરફ, કેન્દ્ર સરકાર માટે આ પ્રોજેક્ટ વ્યૂહાત્મક રીતે મહત્વનો છે, કારણ કે તિબેટમાં યારલુંંગ ત્સાંગપો નદી પર ચીન દ્વારા પ્રસ્તાવિત વિશાળ હાઇડ્રોપાવર પ્રોજેક્ટ સામે આ એક મહત્વનું પગલું છે. આ નદી ભારતમાં પ્રવેશે છે ત્યારે તેને સિયાંગ તરીકે ઓળખવામાં આવે છે.

સોમવારે અરુણાચલના મુખ્યમંત્રી પેમા ખંડુએ એક નિવેદનમાં જણાવ્યું હતું કે, ડેમ નિર્માણ અંગે સહમતિ વિના કોઈ નિર્ણય લેવામાં આવ્યો નથી. તેમણે અપર સિયાંગ ક્ષેત્રમાં ૩૬ કલાકના શટડાઉન કોલને પાછો ખેંચવા અપીલ કરી હતી. મુખ્યમંત્રીએ સ્પષ્ટ કર્યું હતું કે, "હું સ્પષ્ટ કરી દઉં કે, અમે આ તબક્કે ડેમ નિર્માણ વિશે વાત નથી કરી રહ્યા." તેમણે સમજાવ્યું કે સરકાર હાલમાં માત્ર પ્રોજેક્ટની વ્યવહારિકતા અને સંભવિત અસરોનું મૂલ્યાંકન કરવા માટે પ્રી-ફિઝિબિલિટી રિપોર્ટ (પીએફઆર) પર વિચાર કરી રહી છે.

એનડીટીવી ઈન્ડિયાના અહેવાલ મુજબ, રાજેશ કુમાર સીઆરપીએફમાં સ્પેશિયલ ડીજી તરીકે કાર્યરત હતા અને તેમને જમ્મુ-કાશ્મીરમાં સુરક્ષા તેમજ આતંકવાદ વિરોધી અભિયાનોનો લાંબો અનુભવ છે.